“Laiha ida falla ka problema”

OEKUSI, 13 Novembru 2025 (TATOLI) – Prezidente Komisaun Organizadora ba komemorasaun loron nasionál juventude no loron akontesimentu Masakre Santa-Kruz 12 Novembru, iha Rejiaun Administrativa Espesiál Oekusi Ambeno (RAEOA), Orlandus Colo, hateten, atividade prinsipál neen implementa durante loron neen, la’o ho susesu no ambiente hakmatek tanba hetan apoia másima husi Komandu Polísia Nasionál Timor-Leste (PNTL).

“Atividade neen, ne’ebé ita planeia ona ba selebrasaun ne’e, ita hala’o hotu laiha ida falla ka problema, ita komesa iha sesta semana kotuk, hahú ho limpeza depois misa, kompetisaun diskursu, sertame, doasaun raan no atividade seluktan, ne’ebé atividade neen ita hala’o to’o horsehik durante loron neen, ita orgullu tanba to’o enserramentu atividade sira la’o di’ak no susesu ho situasaun hakmatek, maibé ida-ne’e mós tanba hetan apoia másimu husi parte hotu, tantu Governu Sentrál no mós Autoridade RAEOA,” nia hateten iha Oekusi, ohin.

Nia relata, fonte orsamentu ne’ebé finansia atividade prinsipál neen ne’e hamutuk rihun $12,900.00, ne’ebé apoia husi Ministériu Juventude Desportu, Arte no Kultura (MJDAK) $2.900 no husi Autoridade RAEOA rihun $10.

“Ita agradese tanba ho fundu ne’e, ita fahe ba sub-rejiaun haat, hodi komemora loron nasionál ne’e, ne’ebé atividade barak mak hala’o iha kada sub-rejiaun sira, maibé importante ida mak ita mentaliza estudante sira liuhusi kompetisaun sertame no diskursu públiku, nune’e sira bele iha esforsa hodi estuda nu’udar preparasaun ba futuru rai ne’e,” nia orgullu.

Tanba ne’e, nia reprezenta komisaun organizadora, hato’o agradese ba entidade hotu nia prontidaun, liuliu komandu PNTL Oekusi tanba fó seguránsa másima iha selebrasaun ne’e inklui autoridade komunitária, igreja no estudante sira-nia partisipasaun.

Notísia relevante:Saúde Oekusi hala’o akampamentu triajen masál no konsulta espesialidade iha Oesilo 

Hanesan juventude tenke estuda

Jaimé da Costa, nu’udar estudante sertame husi Eskola Téknika Vokasionál Lifau, orgullu tanba iha komemorasaun loron nasionál ne’e, fó prioridade ba estudante sira, oinsa bele hasa’e koñesimentu liuhusi kompetisaun diskursu, sertame no seluktan.

“Nu’udar estudante, sente orgullu tanba liuhusi kompetisaun ne’e, ami bele aumenta ami-nia mentalidade no koñesimentu, tanba ami mai kompete ho maluk eskola sira seluk, ita sente rame, kuandu ita responde pergunta sira loos, balun responde sala, maibé liuhusi eventu sira hanesan mak bele motiva ami estudante oinsá bele prepara estuda no oinsá ko’alia iha públiku,” nia hateten.

Nu’udar foinsa’e, nia konsidera selebrasaun loron Masakre Santa-Kruz, ida-ne’e fó hanoin tebes mai ita, katak iha pasadu ita tenke hanoin hodi hateke ba oin luta ba futuru, tanba luta pasadu hetan ona nia rezultadu mak ukun rasik aan, maibé luta ba futuru tenke kontribui hanesan juventude ida tenke estuda no serbisu hodi dezenvolve ita-nia nasaun.

Notísia relevante:RAEOA ajenda atividade neen komemora 12 novembru no loron nasionál juventude

Entretantu, atividade prinsipál neen, ne’ebé implementa durante loron neen (6), mak hanesan iha sesta-feira ohin, loron 07 Novembru 2025, hahú halo deskrisaun ba atividade limpeza jerál iha resintu Sentru Juventude Rejiaun Oekusi (SJRO) no limpeza mós ba igreja parókia Numbei no igreja antigu Santo António depois hala’o limpeza mós ba semitériu Santa-Kruz iha bairru Santa-Rosa, ne’ebé responsavel másimu husi juventude no estudante sira inklui instituisaun Estadu sira.

Atividade daruak iha loron sabadu 08 Novembru, komisaun organizadora sei organiza hodi monta panfleta ka banner iha fatin públiku, monta tenda preparasaun inklui halo dekorasaun no domingu 09 Novembru, hala’o misa agradesimentu iha igreja parókia Numbei.

Atividade datoluk, iha loron segunda 10 Novembru, abertura jerál atividade komemorasaun Masakre Santa-Krus no selebrasaun loron nasionál juvuntude 12 Novembru 2025 nian, fatin iha resintu Sentru Juvnetude Rejiaun Oekusi, hafoin ne’e, kontinua kedas abertura sertame ba estudante sira no hala’o doasaun raan iha ospitál referál Oekusi no mós hala’o semináriu públiku.

Atividade dahaat, iha loron tersa-feira 11 Novembru, atividade diskursu kalan reflesaun sei aprezenta husi Prezidente Komite 12 Novembru RAEOA nian no padre parokia igreja Numbei, Carlos de Deus. Depois kontinua kedas ba demostrasaun sunu lilin, kontinua asiste filmajén akontesimentu 12 Novembru 1991, dahur hamutuk, depois misa, hafoin misa remata komisaun organizadora organiza halo pawai no kari ai-funan iha semitériu santa-krus bairru Santa-Rosa.

Atividade ikusliu, iha loron kuarta-feira 12 Novembru, kompetisaun sertame no diskursu públiku depois kontinua fahe prémiu ba manán na’in-sira no enserramentu jantar fraternidade.

Notísia relevante:RAEOA enserra komemorasaun 12 Novembru ho misa no kari ai-funan iha semitériu

Tema ba komemorasaun loron nasionál juventude no loron akontesimentu Masakre Santa-Krus 12 Novembru ba tinan ne’e mak, ‘Ha’u Timoroan Orgullu ho Ha’u-Nia Nasaun’

Jornalista: Abílio Elo Nini

Editór: Rafael Ximenes de A. Belo