Peskadór Batugadé hasoru difikuldade ho bero manuál no husu apoiu Governu
BOBONARU, 14 Novembru 2025 (TATOLI)-Peskadór sira iha suku Batugadé, postu administrativu Balibó, munisípiu Bobonaru, husu ba Governu, liuliu Ministériu Agrikultura, Pekuária, Peska no Floresta (MAPPF) atu apoia ró peska ho kapasidade boot hodi fasilita sira-nian atividade, tanba tinan barak ona utiliza de’it bero manuál.
Peskadór Basílio Soares Pereira dehan bainhira tempu udan no ondas boot susar tebes atu halo atividade peska tanba bero ki’ik liu.
Notísia relevante: Lautem: Mundansa Klimátika fó impaktu ba peskadór Suku Com, pasivu hala’o peska
“Ami uza bero ki’ikoan hasoru tasi-boot ne’e mak difikulta ami, tanba ne’e presiza bero fiberglass para fasilita ami, sai bá li’ur [peska] mós ami sente difikuldade ne’e mós kmaan”, nia informa iha tasi-ibun Batugadé, ohin.
Basílio dehan maski hasoru difikuldade, maibé sira kontinua tama tasi-laran tanba ekonomia família depende ba atividade peska.
Tuir nia, rendimentu kada loron la permanente, tanba depende de’it ba sorte. “Depende de’it ba ikan tama, más rendimentu kada loron atu atende ba nesesidade sosa modo nia hanesan $1 ho $2 ne’e iha hela de’it. Kuandu ikan sai, ami dalaruma bele hetan to’o $100, la’e $20 ou $30”, nia relata.
Peskadór Domingos de Jesus reforsa katak sira mós presiza eskipamentu seluk hanesan rede ba kail ikan no materiál konaba salva-an nia.
“Ami durante ne’e hodi osan rasik mak sosa. Dalaruma to’o tempu tasi boot, fo’er barak, entaun kait ba kait mai rede aat hotu. Osan la to’o atu hola, ami suku fali mak soe. Ami mós laiha sasán sira ne’ebé kuandu bero mout ho ami atu salva-an nian. Durante ne’e ami hasoru problema ho bero, ami konfia nani bá to’o rai-maran, ida-ne’e mós dalaruma bele fó ameasa ba ami-nia vida”, nia dehan.
Peskadór sira ne’e salienta grupu balu foin lalais ne’e hetan ona apoia ró peska husi Governu, maibé la sufisiente, tanba ne’e sira sujere atu tulun tan.
Notisía relevante: MAPPF halo akizisaun ba ró peska unidade 140
Jornalista: Sérgio da Cruz
Editora: Maria Auxiliadora
