Empreza Macquarie Group Austrália hakarak investe iha Timor-Leste
DILI, 15 Novembru 2025 (TATOLI)–CEO Empreza Macquarie Group Ltd husi Sydney, Austrália, Shemara Wikramanayake, hakarak halo investimentu iha Timor-Leste.
“Foin Primeravéz mai hasoru malu ho Primeiru-Ministru (PM), Kay Rala Xanana Gusmão, hodi aprezenta aan tanba iha interese hakarak atu halo investimentu iha Timor-Leste,” Shemara dehan hafoin sorumutu ho PM, iha Palásiu Governu, Sábadu ne’e.
Nia hatutan, Empreza Macquarie Group Ltd mak empreza servisu finanseiru globál ida ho sede iha Sydney, Austrália, ne’ebé oferese jestaun ativa, bankária, asesória no solusaun sira kapitál nian iha dívida, ekuidade no merkadoria sira.
“Empreza ne’e opera liuhosi divizaun prinsipál haat mak hanesan Macquarie Asset Management, Bankary and Financial Services, Commodities and Global Markets no Macquarie Capital,” nia subliña.
Iha sorumutu ne’e, Xefe Governu Xanana rekomenda ba dirijente empreza ne’e atu hasoru direta membru Governu relevante hodibele esplora di‘ak liután posibilidade saida mak interesada ba investimentu iha futuru.
Iha sorumutu entre Xefe Governu ho Shemara Wikramanayake, akompaña hosi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay.
Jornalista: Osória Marques
Editór: Xisto Freitas da Piedade
