Grupu Unidade Suai-Loro ho inisiativa hamoos lixu iha tasi ibun
KOVALIMA, 17 Novembru 2025 (TATOLI)- Grupu Unidade Suku Suai-Loro, Postu Administrativu Suai-Loro, durante fulan-ida halo ona limpeza iha tasi ibun no konsege rekolla ona lixu hamutuk tonelada 15.
“Ami nia grupu ida-ne’e konsege hamoos lixu iha fatin-sira hanesan parte ai-parapa iha tasi ibun iha Suku Suai Loro ne’ebé konsege hamoos lixu tonelada 15” , Xefe Grupu Unidade Suai Loro, Guilhermino Felix Guntur, dehan ba TATOLI iha Suai-Loro, ohin.
Grupu sira durante hamoos lixu iha tasi ibun Suai hasoru difikuldade tanba komunidade laiha konsensia hodi so’e lixu arbiru .
“Presiza ita hotu-nia kontribuisaun liuliu Suai Loro nia-oan sira atu so’e lixu iha nia fatin tanba Suai-Loro atu sai furak ne’e iha ita-nia liman la’os ema seluk maka mai rezolve ita-nia problema. Tanba ita hatene Suai Loro potensiál ba fatin turizmu bainhira ita la hamoos mak estraga ita nia ambiente,” nia alerta.
Suku Suai Loro iha nia fatin liseiru besik 10, maibé hafoin komunidade so’e lixu iha lixu fatin, laiha karreta atu mai raut, nune’e komunidade sira sunu de’it iha lixu fatin hodi estraga fatin lixu ne’ebé mak konstrui. Nune’e autoridade munisípiu atu halo kontrolu ba fatin lixu.
Iha fatin hanesan, Diretór Servisu munisipál Agua Saniamento no Ambiente, Angelino Henrique esplika, Autoridade Munisípiu Kovalima liuhusi Agua Saniamento no Ambiente kontrata Empreza Crazy Horse maka raut lixu iha kapitál munisípiu.
“Ita nia empreza loronloron rekolla lixu iha estasaun liseira fatin 14 iha kapitál munisípiu ne’ebé kada loron rekolla karreta haat hodi ba so’e iha Haemanu”, nia afirma.
Prosesu kontratu empreza raut lixu, autoridade Kovalima selu empreza $2,75, bazeia ba kontratu loron ida empreza raut ret haat dader ret rua no lokraik ret rua ne’ebé hetan akompañamentu husi funsionáriu sira.
Jornalista: Celestina Teles
Editór : Florencio Miranda Ximenes
