DILI, 28 Novembru 2025 (TATOLI)–Luta ba ukun-aan parte husi esforsu hodi liberta aan husi koloniál nia ukun iha-ne’ebé ikus mai lutadór sira hanaran eroi ba ukun rasik aan, maibé hafoin gaña liberdade, maibé futebolista hanesan jerasaun kontinuadór hodi luta eleva Timor-Leste iha mundu internasionál liuhusi futeból.
Eis jogadór Zebra atuál Diretór Serbisu Selesaun Nasionál Federasaun Futeból Timor-Leste (FFTL), João Manico Amaral hateten kestaun ne’e iha nia kna’ar fatin, Bairros dos Grilos, Sesta ne’e, relasiona ho selebrasaun Loron Proklamasaun Independénsia RDTL ba da-50.
Nia esplika eroi iha tempu luta nian maioria lori arma liuhusi forsa armada ho objetivu reziste hasoru okupante, más kompara ho futeból bainhira jogadór sira iha kampu hananu ona inu nasionál no jogu hasoru nasaun seluk, parte husi luta lori Timor-Leste ba mundu internasionál.
“Dezenvolvimentu patriotizmu iha futeból ita sempre fó-hanoin ba jogadór sira, liuliu bainhira hakat ain iha kampu tenke iha espíritu nasionalizmu tanba parte husi luta Timor-Leste iha mundu internasionál liuhusi futeból,” João Manico informa.
Manico relata bazeia ba istória luta Timor-Leste nian ne’ebé lakon vida ho durasaun tempu naruk, nune’e mós dezenvolvimentu futeból presiza investe, to’o tempu futeból sei sai orgullu nasionál.
Manico hateten misaun FFTL mai ho lema ‘futeból sai orgullu nasionál’, pratikamente hanesan jogadór sira obrigadu tenke dekór Inu Nasionál Pátria-Pátria, devér hatene istória luta Timor-Leste iha pasadu no bainhira hananu tenke tau liman iha fuan tanba jogadór sira-ne’e reprezenta eroi sira-ne’ebé mate ona.
Jerente FFTL ne’e argumenta órgaun futeból iha Timor-Leste nafatin esforsu hodi eleva prestasaun futeból iha mundu internasionál iha-ne’ebé hahú fazeadamente konstrui métudu treinu ne’ebé modernu liuhusi prezensa treinadór prinsipál husi estranjeiru, dezenvolve kurríkulu futeból bazeia ba natureza Timor-Leste, moderniza fasilidade modernu hanesan tempu besik reabilita Estádiu Munisipál Dili no konstrusaun estádiu foun no kampu futsál indoor iha Tasi-Tolu.
Aleinde ne’e, planeia fini jogadór liuhusi kria kompetisaun Kopa Juveníl iha kada Asosiasaun Futeból Munisipál no tinan-2026 hala’o kompetisaun Liga Juveníl Sub-17 no haruka jogadór potensiál ba estranjeiru hodi tuir formasaun.
Entretantu, FFTL eziste tinan-23 ona iha-ne’ebé funda iha tinan 2002 no sai membru Asian Football Federation (AFF), adere ona ba Asian Football Confederation (AFC) no sai membru FIFA.
Jornalista: Natalino Belo
Editór: Xisto Freitas da Piedade
