DILI, 29 NOVEMBRU 2025 (TATOLI)—Ekipa Misaun Observasaun Eleitorál husi g7+ termina ona misaun hanesan observadór ba eleisaun jerál Prezidensiál no Parlamentár iha Giné-Bisau ne’ebé realiza iha23 Novembru 2025.
Notísia Relevante: Ilídio Vieira nomeadu nu’udar Primeiru-Ministru Giné-Bisau
Ekipa Misaun Observasaun Eleitorál ne’e kompostu Diretór Adjunto Komisaun Eleitorál Illa Salomão ka Xefe Misaun Misaun Observasaun (MOE) g7+, Christina Joanna Mitini, Diretór Operasaun g7+, Felix Piedade, Diretór-Jerál Sekretariadu Tékniku Administrasaun Eleitorál (STAE), Elviro Fernandes Moniz, Sekretáriu Jerál Komisaun Nasionál Eleisaun, Repúblika Demokrática Saun Tomé no Príncipe, Melvim Nascimento Castro, Tékniku Protokolu no Parseiru G7+, Elísio Monteiro Valadares, no Asistente Pesoál G7+, Vitor Liu Gonçalves.
Atividade ne’ebé ekipa MOE g7+ halo durante iha Giné-Bisau hahú husi 18-23 Novembru 2025 hala’o atividade sira hanesan hasoru malu ho partidu polítiku sira, Komisaun Nasionál Eleisaun CNE Giné-Bisau nian inklui hasoru malu MOE sira seluk hanesan MOE husi Komunidade País Ko’alia Lian Portugés (CPLP, sigla portugés), Uniaun Áfrikanu, no Komunidade Ekonómika Estadu Áfrika Osidental (CEDEAO, sigla portugés) no halo observasaun ba eleisaun jerál Prezidensiál no Parlamentár (Lejilativa).
Diretór Operasionál g7+, Felix Piedade, hateten depoizde observasaun ba eleisaun iha Giné-Bisau, iha loron 25 Novembru 2025, Ekipa g7+ aprezenta ninian relatóriu prelimináriu iha konferénsia imprensa ne’ebé organiza husi Uniaun Afrikanu no CEDEAO, inklui Grupu observadór seluk ne’ebé mak marka prezensa mós iha sesaun ne’e mak CPLP.
Nia esplika, loron ida antes rezultadu eleisaun nian fó sai husi CNE Giné-Bisau, derepente rona tiruteiu iha 26 Novembru 2025 loron manas iha Sidade Bissau ne’ebé halo ema hotu tauk no halai buka fatin ne’ebé seguru.
“Liu de’it oras hira nian laran, Komandante Militár Giné-Bisau nian halo deklarasaun katak sira toma kontrola Estadu tanba iha krize eleitorál, ne’eduni sira hatun Prezidente Republika no suspende imediata prosesu eleisaun tomak ka taka fronteira (rai, tasi no aero) no implementa estado de sítio. Iha loron 26-27, situasaun sidade Bissu kuaze mamuk tanba laiha movimentu ba-mai,” Felix Piedade ba Tatoli iha Lisboa.
Nia subliña, situasaun ida-ne’e halo ekipa g7+ ne’ebé mak tuir loloos atu fila iha 27 Novembru 2025 tenke muda fali viajem tanba fronteira Giné-Bisau nian taka totál.
Durante loron rua tomak nian laran, ekipa g7+ labele sai no labele akompaña situasaun iha Giné-Bisau tanba mídia sosiál sira hanesan facebook, instragram, Tiktok, taka totál entaun só bele hela de’it iha Otél.
Maibé iha loron 28 Novembru 2025, situasaun iha sidade Bisau laran foin normal fila-fali, transporte públiku komesa la’o fali no povu mós halo fali ona sira-nian atividade loro-loron nian, maka ekipa g7+ bele halo fali viajen sai husi Giné-Bisau no finalmente iha sesta (28 Novembru 2025) kalan, ekipa g7+ to’o Lisboa, Portugál hodi kontinua sira nian viajen fila ba Timor-Leste.
Jornalista : Arminda Fonseca
Editór : Cancio Ximenes
