FHT husu Governu mellora formasaun seguransa dijitál ba sosiedade

DILI, 09 Dezembru 2025 (TATOLI)—Diretór Ezekutivu Fundasaun Hadomi Timor, Abrão Monteiro, solisita Governu atu mellora formasaun seguransa dijitál ba sosiedade hodi garante utilizasaun sistema dijitál ho seguru no saudável.

Diretór Ezekutivu Fundasaun Hadomi Timor, Abrão Monteiro, husu mós Governu atu tau literásia dijitál iha kurríkulu ensinu báziku to’o universidade, tanba durante ne’e Governu nia programa liga ba literásia ne’e menus tebes.

“Maibé durante ne’e ami halo formasaun literásia no seguransa dijitál ba aldeia lubuk ida iha territóriu nasionál, tanba se Governu lahalo ami mós tenke fó responsabilidade hodi kapasita sidadaun sira iha koñesementu ba sistema dijitalizasaun ba kombate krime tranzitória, tanba espasu dijitál iha ameasa nia laran, enkuantu laiha lei ne’ebé proteje,” Diretór Ezekutivu ne’e informa ba jornalista iha Fundasaun Oriente, ohin.

Dirijente ne’e dehan, sosiedade barak mak sai vítima ba scanning online ne’ebé espalla iha plataforma mídia sosiál, liuliu informasaun bosok kona-ba manán prémiu no bolsa estudu nian, atu garante labele monu ba lasu sira entaun presiza reforsa formasaun seguransa dijitál ba sosiedade.

Iha biban ne’e, Siretór Jerál Sekretária Estadu Komunikasaun Sosiál, Florindo da Costa, apresia tebes esforsu servisu husi Fundasaun Hadomi Timor nian ne’ebé preokupa tebes ba informasaun ne’ebé sempre espalla informasaun falsu ka “Hoax”.

“Entaun lei ida ne’ebrlé mak atu asegura no kontrola kona-ba asuntus ne’e, tanba iha mós tama ona membru ASEAN entaun presiza hadi’a no fortalese lei sira kona-ba seguransa dijitalizasaun,” nia dehan.

Fundasaun Hadomi Timor mós konsidera katak durante ne’e sira halo formasaun seguransa dijitaliasaun ba sosiedade ladun másimu, tanba durante ne’e sosializasaun hala’o ba universitáriu sira no bazeia ba pedidu proposta husi proponente sira.

Jornalista : Alexandra da Costa

Editór        : Cancio Ximenes