KOVALIMA,09 Dezembru 2025 (TATOLI) – Diretór Servisu Munisipál Agua Saniamentu no Ambiente (SMASA), Angelino Henrique, alerta ba komunidade sira so’e lixu iha lixeiru ne’ebé maka prepara ona no labele so’e arbiru tanba estraga ambiente.
“Ha’u ho ekipa observa katak komunidade sira so’e lixu arbiru de’it la so’e iha lixeiru ne’ebé maka prepara husi SMASA rasik no so’e lixu iha auto estrada ninin nune’e empreza ne’ebe autoridade kontrata bainhira rekolla lixu presiza lori tempu,” Dirijente SMASA, Angelino Henrique, informa ba TATOLI, iha Bairru-Kosta, ohin.
Razaun komunidade so’e lixu la tau iha nia fatin, nia dehan: “Ita la hatene, nune’e autoridade Kovalima presiza kria planu no progama atu halo sosializasaun ba komunidade sira, nune’e bele hasa’e komunidade nia konsénsia atu so’e lixu iha lixeiru sira hodi fasilita empreza sira rekolla lixu ho di’ak”, nia afirma.
Tuir planu SMASA sei halo sosializa informasaun ba komundade iha área sira hanesan iha postu Maucatar, iha Suku Ogues, Suku Camnasa, no suku Debos parte husi postu Administrativu Suai, Munisipiu Kovalima.
Tuir mapamentu husi postu administrativu Suai SMASA prepara fatin estasaun atu so’e lixu ba komunidade hamutuk 17, maibé realidade komunidade sira so’e lixu la tau iha fatin estasaun lixu no so’e iha lixeiru.
Durante ne’e , Autoridade Kovalima kontatra empreza Krazy Horse maka rekolla lixu iha oras tuku 07:00 to’o 12:00 hafoin kontinua rekolla fali lixu iha 14:00 to’o 17:00 kada loron , kamionete rua maka rekolla lixu hodi ba so’e iha lixeiruHaemanu.
Oráriu ne’ebé maka SMASA kria atu rekolla lixu la fó impaktu ba movimentu transporte públiku no privadu tanba durante ne’e empreza hasoru difikuldade maka komunidade sira iha merkadu maka so’e lixu la tau iha nia fatin maibé so’e fali iha estrada ninin.
Iha fatin hanesan, Komunidade João Amaral, husu Autoridade presiza duni kria programa hodi sosializa informasaun, nune’e bele hasa’e komunidade nia konsénsia tanba durante ne’e so’e lixu la tau iha nia fatin no so’e de’it iha estrada ninin.
“Durante ne’e, ha’u mós observa duni katak komunidade sira ne’ebé maka faan sasan iha merkadu so’e lixu la tau iha nia fatin maibé so’e fali iha estrada ninin, nune’e halo amibiente iha merkadu ladun di’ak”. nia reforsa.
Jornalista:Celestina Teles
Editór: Florencio Miranda Ximenes
