DILI, 23 Dezembru 2025 (TATOLI)—Ekipa futeból femininu Maudoko doko (manán) UNITAL Football Club ho skor 5-0, enkuantu Kulugisa kontinua derrota bainhira hasoru Maranatha ho skor 0-6 iha jornada dasiak primeira divizaun Liga Futeból Femininu Timor-Leste.
Ekipa Maudoko gaña pontu tolu iha Estádiu Munisipál Dili, Sesta (19/12/2025), iha-ne’ebé lidera 2-0 iha primeira parte ne’ebé golu referidu enxe husi jogadora Ina Paulanda iha minutu 18 no Sabrina Mutiara minutu 39, golu tolu seluk prodús iha parte daruak liuhusi jogadora sira hanesan Feni Barek iha minutu 64 inklui golu tolu seluk prodús husi jogadora Sabrina Mutiara iha minutu 53 no 90.
Enkuantu, Kulugisa FC obrigadu kontinua derrota hafoin Maranatha FC dere ho skor 0-6 hafoin hala’o jogu iha Estádiu Munisipál Dili, Sábadu (20/12/2025), iha-ne’ebé jogu parte dahuluk ramata ho skor 0-2 ne’ebé enxe husi jogadora Ratri Titánia iha minutu 17 no Nova Sofi minutu 41.
Notísia relevante: Maudoko FC okupa pozisaun daruak hafoin halakon Akadémika 4-0
Iha jogu parte daruak, Maranatha aumenta tan golu haat iha-ne’ebé prodús liuhusi jogadór sira hanesan Joana Barbosa minutu 50, Ratri Titánia 69 no golu rua seluk enxe husi Nova Sofi iha minutu 78 no 86.
Ho rezultadu jogu referidu, rezulta Maudoko FC okupa pozisaun dahaat iha tabela klasifikasaun ho pontu 17 no Maranatha FC iha pozisaun dalimak ho pontu 17, rezultadu manán lima (5), derrota rua (2) no impata rua (2).
Entretantu, UNITAL FC okupa iha pozisaun dahitu ho pontu sia (9), enkuantu Kulugisa kontinua sofre iha pozisaun dasanuluk ho pontu 0, rezultadu derrota hamutuk sia (9).
Jornalista: Natalino Belo
Editór: Xisto Freitas da Piedade
