DILI, 25 Dezembru 2025 (TATOLI)-Padre selebrante, Cesar Magno, iha nia omília iha misa selebrasaun Natál, iha Igreja Balide, hateten ho Kosok-oan Jezús nia moris nakonu ho naroman no grasa.
Saserdote ne’e dehan horikalan selebra no kontempla hamutuk hanesan Igreja mistériu ida ne’ebé ema nunka hateten labarik oan ida moris mai ki’ak no fraku husi inan virjen.
“Bainhira ita mai iha igreja ne’e, nakonu ho pás ne’ebé lori husi Kosok-oan ne’e, ne’ebé mai husi lalehan iha kalan nakukun. Agora kalan liu ona, naroman ho loron ne’ebé aas ba daudaun, ita hakbesik an atu haree ida ne’ebé toba hakmatek iha Maria liman laran”, nia hateten.
Amu selebrante ne’e hateten ida ne’ebé profeta no povu Izraél no fiar-na’in sira hein Maromak nia oan mane Jezús ne’ebé sai na’in ba buat hothotu. “Nia mak roman Aman Maromak nian, fó moris ba mundu tomak, Na’i ita-nia esperansa”, nia haklaken.
Padre Cesar hateten hori uluk kedas liafuan iha nanis ba Maromak, nu’udar sarani no fiar-na’in la dúvida simu Kosok-oan mak wee matan moris iha mundu ne’e.
“Ninia moris nu’udar roman ida ba ema tomak, naroman mai atu leno, harohan ita, lori ita moris ema nia no hakonu ita ho moris rohan-la’ek nian”.
“Nia mai atu foti ita-nia frakeza, mortalidade hodi fó fali buat ne’ebé di’ak, mai hakonu ita ho grasa no lia loos”.
Tuir bibi-atan ne’e, iha mundu ida ne’ebé ameasa ho esperansa ne’ebé barak tebes no moris ne’ebé nakonu ho imajinasaun no bosok. Nune’e, sarani sira loron ohin nakonu ho roman no pás, Maromak nia liafuan ne’ebé fó.
Haree ba mundu loron ohin nian hakilar liberdade, abortu, grupuizmu, moralidade no família ne’ebé rahun, halo joven laiha esperansa, laiha perdaun, sosiedade ida laiha ona valór ba ema hanesan Maromak nia illas rasik.
Mundu ne’e muda loron moris nian ba festa Natál ba han hemu, hatudu malu, buka malu no ko’alia maibé haluha tiha festa nia na’in loloos mak Na’i, Jezús Kristu.
“Nu’udar itsarani, selebra loron moris ho grasa domin nian atu halibur ita, kontente hamutuk no fiar iha Nia no rona Nia liafuan sira no simu Nia futar isin, ne’ebé moris no mate moris hias, tanba ita ema”, nia konvida.
No simu Kosok-oan Nia moris hias fó mai idaidak atu sai Maromak nia oan no aprende husi Nia ne’ebé perfeitu no sai esperansa tuir la ho ta’uk iha moris, liberdade, hakarak sira no sentimentu hanesan prezente furak ida ba Nia iha loron moris ni’an.
“Ita husik Nia domin ne’ebé Santa tun mai ita-nia fuan no família, nu’udar modelu iha moris, nune’e ita sai ema ne’ebé loos, livremente nakonu ho ksolok”hateten.
Nune’e, selebra Natál selebra hahalok, domin Maromak nian ba ema ne’ebé hatudu naroman la husik no mai loos hela ho no tama iha ema nia istória hakarak lori ksolok loloos.
Notísia relevante; Pe. Heriberto: Selebrasaun natál lori dame no domin
Jornalista: Nelson de Sousa
Editora: Maria Auxiliadora
