DILI, 29 Dezembru 2025 (TATOLI)—Ministru Administrasaun Estatál (MAE), Tomás do Rosário Cabral, informa, Segunda ne’e, Governu sentrál hamutuk ho Prezidente Autoridade Munisípiu sira hotu hala’o reuniaun kona-ba relatóriu prelimináriu avaliasaun kondisaun mínima munisípiu sira, nune’e munisípiu lima (5) mak hetan valór muito bom.
“Iha relatóriu avaliasaun kondisaun mínima, aleinde munisípiu lima (5) hetan muito bom, munisípiu hitu (7) hetan bom. Nune’e, iha relatóriu avaliasaun ne’e sei aprezenta bá Konsellu Ministru no Konsellu Ministru mak sei pronúnsia munisípiu sira-ne’ebé hetan valór di’ak ne’e,” Cabral dehan ba jornalista sira iha INAP, Komoro, Dili.
Notísia relevante: MAE kontinua prioriza preparasaun ba podér lokál
Governante ne’e hatutan laiha valór ida ki’ik, agora presiza mak hadi’a funsionamentu governasaun ne’e iha kraik tanba servisu 19 ho órgaun autónomu ualu (8) Governu sentrál fó tiha ona, sira iha kraik goza orsamentu no administrasaun rasik, só polítika mak iha Governu sentrál.
“Ita haree de’it kada munisípiu ida setór privadu to’o 70-resin. Iha balun kategoria A, balun kategoria B no balun kategoria C. Nune’e, kategoria C ne’e mak iha orsamentu jerál tinan kotuk, tinan ida-ne’e no ba tinan oin. Nune’e, husu ba Ministériu Obra Públika ba kategoria C sira-ne’e MOP tenke fó asistensia téknika tanba setór privadu munisípiu sira maka Governu munisipál nia forsa,” nia subliña.
Nia dehan, tuir lei, primeiru, Governu aprova rezolusaun ida atu kria podér lokál iha 2027. IX Governu tama hodi kria servisu munisipál sira ba autoridade hotu kedas, autoridade sira intranzisaun atu prepara. Depoiz aprovasun rezolusaun Governu tenke lori filafali bá Parlamentu regula fali ho Lei ida A no B sé mak bá sira bá hotu ka ida ne’ebé mak bá ne’e deside husi Konsellu Ministru.
Jornalista: Osória Marques
Editór: Xisto Freitas da Piedade
