OEKUSI, 07 Janeiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Edukasaun no Solidariedade, kuarta ohin, hasai sirkulár ofisiál ida ho númeru referénsia SIRK-DRESS/RAEOA/TL/I/2026, hodi husu ba dirijente eskola sira iha nível ensinu hot-hotu inklui funsionáriu sira katak, komesa ohin ba oin diresaun sei la aprova no autoriza funsionáriu inklui profesór sira atu submete pedidu transferénsia no karta lisensa durante prosesu ensinu aprendizajen.
Notísia relevante:Edukasaun Oekusi estende kontratu funsionáriu na’in-263 inklui profesór 51
Dokumentu ofisiál ne’ebé Ajénsia Tatoli,I.P asesu, karta sirkulár referida sita pontu importante neen ne’ebé presiza kumpre.
Primeiru, Diretór Rejionál Edukasaun no Solidariedade Sosiál sei la aprova kualker pedidu lisensa dezlokasaun profesór no funsionáriu sira ba asuntu privada nian ba munisípiu seluk no estranjeiru (favór foku ba ensinu-aprendizajen)
Daruak, Diretór Rejionál Edukasaun no Solidariedade Sosiál sei la aprova kualker pedidu transferénsia hosi profesór no funsionáriu. Datoluk, Diretór Rejionál Edukasaun no Solidariedade Sosiál sei realiza vizitasaun supreza iha kada eskola hodi observa diretamente ensinu-aprendizajén tenke la’o tuir orientasaun formasaun durante tinan-2025 no presiza implementa iha 2026.
Dahaat, Diretór Rejionál Edukasaun no Solidariedade Sosiál, komunga didi’ak no kle’an kompeténsia haat profesór nian, tanba profesór ne’e vokasaun hodi hala’o misaun.
Dalima, Diretór Rejionál Edukasaun no Solidariedade Sosiál, la autoriza profesór atu marka auzénsia iha tempu ne’ebé hala’o hela tempu letiva iha eskola. Ikusliu, husu kuandu lisensa labele liuhusi loron tolu no tenke aprezenta karta eskrita, hafoin hetan aprovasaun mak bele goza lisensa ne’e.
“Firme no princípio e gentil nas maneiras amar sempre a nossa,” – Firme iha prinsípiu no kmaan iha hahalok, sempre hadomi ita-nian, sita iha karta sirkulár ne’ebé Ajénsia Tatoli,I.P asesu, ohin.
Notísia relevante:Edukasaun Oekusi hasai sirkulár ba estudante 9° ano matrikula de’it iha ESGP paralelu
Iha karta sirkulár ne’e, mós sita pontu adisionál lima dirije ba profesór no funsionáriu sira-ne’ebé tutela iha diresaun Rejionál Edukasaun no Solidariedade Sosiál.
Pontu dahuluk, zero kobransa ba matrikula estudante foun tinan-2026 kuandu la iha akta enkontru no kuñesimentu mai diresaun, ezetu eskola privada sira. Daruak, komesa loron segunda-feira, 05 Janeiru 2026 hahú ona tama ba tinan eskolár 2026.
Pontu datoluk, durante semana primeiru evita orientasaun ba estudante foun ho karatér “torturasaun”. Dahaat, iha loron kinta-feira, 08 Janeiru 2026 dadus estudante entrega ona mai diresaun.
Dahaat iha loron segunda-feira, 12 Janeiru 2026 hahú Ensinu aprendijazen pontu ikusliu, simu profesór bolsa kandidatu foun ba Ensinu Sekundária Jerál no Ensinu Sekundária Téknika Vokasionál atu kondisiona no tulun serbisu no hala’o misaun.
Notísia relevante:Edukasaun Oekusi suspende atividade letiva hodi konsentra ba ezame nasionál
Jornalista: Abílio Elo Nini
Editór: Rafael Ximenes de A. Belo
