KOVALIMA, 08 Janeiru 2026 (TATOLI) – Diretór Servisu Munisipál Agua Saniamentu no Ambiente (SMASA), Angelino Henrique orienta funsionáriu sira halibur lixu ne’ebé maka negosiante iha merkadu so’e iha estrada ninin parte merkadu Debos ,Postu Administrativu Suai, Munisípiu Kovalima.
“ Ha’u orienta ha’u nia funsionáriu atu halibur lixu ne’ebé maka nia negosiante sira so’e iha estrada ninin, atu lixu labele naklekar to’o mai iha estrada hodi difikulta movimentu transporte públiku sira”, Diretór ne’e informa ba TATOLI , iha Bairu Kosta, ohin.
Daudaun ne’e, empreza Sobudoi Unipesoal, Lda la rekolla lixu tanba sei hein kontratu foun, maske husi SMASA fó ona karta ba Prezidente Autoridade Kovalima, maibe PAM seidauk hatun despaxu.
Prosesu empreza atu rekolla lixu, nia dehan presiza estende empreza Sabudoi nia kontratu durante fulan-tolu, nune’e hodi hein konkursu públiku.
“Ita prepara lixeiru hamutuk 17 , maibé daudaun lixeiru sira nakonu ho lixu tanba empreza seidauk bele rekolla no sei hein kontratu husi servisu munisipál aprovizionamentu”, nia afirma.
Jornalista: Celestina Teles
Editór: Florencio Miranda Ximenes
