IADE fasilita formasaun literásia finanseira ba joven sira iha Vikeke
VIKEKE, 20 Janeiru 2026 (TATOLI)–Diretór Institutu de Apoiu ba Dezenvolvimentu Emprezariál (IADE), Antonito do Rosário informa IADE Munisípiu Vikeke fasilita formasaun literásia finanseira ba joven traballadór Austrália sira.
“Ohin ami oferese formasaun literásia finanseira ba joven sira-ne’ebé fila husi Austrália no kandidatu traballadór sira-ne’ebé atu bá servisu iha Austrália, ho objetivu oinsá mak bele forma joven sira atu investe iha vida negósiu, hasa’e koñesimentu no abilidade família nian hodi bele planeia no atinje sira-nia objetivu finanseira, apoia família atu planeia didi’ak sira-nia gastu, dezisaun ba investimentu no poupansa, promove feto sira-nia kapasidade atu halo desizaun ekonomia iha família nia laran. Formasaun ne’e hetan apoiu finanseiru husi International Labour Organization (ILO) no Uniaun Europeia,” Antonito ba TATOLI iha Postu Vikeke Vila, Tersa ne’e.
Direjente IADE ne’e relata formasaun ne’ebé IADE oferese hamutuk tipu tolu mak hanesan ideia negósiu, komesa negósiu no formasaun literásia finanseira família nian ba joven sira.
Nia husu formandu sira aproveita formasaun ne’e no tenke implementa, karik implementa hasoru dezafiu, IADE prontu akompaña.
“Ha’u hakarak husu ba joven sira-ne’ebé hetan formasaun labele nonook, más tenke implementa iha atividade negosia. Karik hasoru dezafiu ruma bele mai konsulta ami. Ami prontu ajuda joven sira-nia negósiu,” nia akresenta.
Entretantu, formadór husi formasaun ne’e husi IADE Munisípiu Vikeke no partisipa husi joven hamutuk na’in-25. Formasaun ne’e durante loron tolu ne’ebé hahú 19-21 Dezembru.
Jornalista: Vitorino Lopes da Costa
Editór: Xisto Freitas da Piedade
