PAM Kovalima husu negosiante sira iha merkadu Debos labele so’e lixu arbiru
KOVALIMA, 21 Janeiru 2026 (TATOLI) – Prezidente Autoridade Munisípiu Kovalima, Miguel Armada Cardoso, husu nafatin ba komunidade tau konsénsia hodi so’e lixu iha fatin, nune’e labele hamosu ambiente la saudavel iha merkadu Debos, Postu Aadministrativu Suai, Munisipiu Kovalima .
“Itaselebra ona kontratu ho empreza Sabudoy Unipesoal Lda no termina iha loron ikus fulan-Dezembru 2025 ne’e. Hafoin ne’e ita halo ona renovasaun kontratu ho empreza empreza Sabudoy Unipesoal Lda, nune’e husu komunidade presiza iha konsénsia hodi soe lixu iha fatin, mak empreza ne’e ba rekolla”, nia dehan.
PAM esplika, prosesu renovasaun kontratu tarde oituan, maibé prosesu tomak atu rekolla lixu iha kapitál munisípiu entrega ba empreza, tanba komunidade iha merkadu barak no la iha konsénsia hodi so’e fali animal mate iha lixeira hodi fó impaku ba komunidade no negosiante sira.
“Komunidade no negosiante sira so’e lixu la ho konsénsia, razaun tanba so’e lixu la tama ba lixeira laran,, maibé husi Servisu Munisipál Água Saneamentu no Ambiente (SMASA) no Servisu Munisipál Jestaun Merkadu no Turizmu (SMGMT) organiza malu atu halo jestaun di’ak liu”, nia promete.
Tuir dadus ne’ebé maka TATOLI asesu husi Diretór Servisu Munisipál Água Saneamentu no Ambiente (SMASA) katak bazeia ba mapamentu husi postu administrativu Suai konstrui ona lixeira hamutuk 17.
Komunidade husu konstrui lixeira
Abitante Debos, Postu Suai, Olinda de Araújo, husu ba autoridade atu fó atensaun no bainhira konstrui lixeira públiku tenke identifika fatin di’ak, nune’e labele fó impaktu ba saúde públiku liuliu negosiante sira iha merkadu.
“Tuir loloos ita-nia autoridade atu konstrui lixeira públiku tenke haree nia fatin tanba realidade hatudu komunidade no negosiante balun so’e lixu la tama ba lixeira laran, maibé tau de’it lixeira oin, nune’e iha tempu udan halo lixu dois no lalar halai sai sirkula iha merkadu no halo ambiente ladun seguru”, nia lamenta.
Entretantu, Xefe Suku Debos, Agostinho da Silva, rekoñese tanba observa hela kona-ba problema lixu ne’ebé kria ambiente ladun saudavél ba komunidade ho negosiante sira iha merkadu.
“Komunidade no negosiante nia preokupasaun kona-ba ambiente ne’e loos ,tanba durante ne’e ha’u mós observa hela komunidade balun soe lixu arbiru no laiha konsénsia”, nia dehan.
Ho preokupasaun komunidade no negosiante sira hanesan xefe Suku iha responsabilidade hodi halo koordenasaun ho Autoridade Munisípiu Kovalima hodi estabelese tan Lixeira nune’e komunidade sira labele so’e lixu arbiru.
Jornalista: Celestina Teles
Editór: Florencio Miranda Ximenes
