VIKEKE, 26 Janeiru 2026 (TATOLI)–Reprezentante Veteranu Postu Administrativu Ossú, Munisípiu Vikeke, Francisco Melo Cabral ‘Matakeu’, husu Governu koloka guarda seguransa ba iha sítiu turístiku Jornada Rezisténsia Uasadiga ne’ebé agora sai abandonadu.
“Uluk ita-nia Governu dezenvolve ona sítiu turístiku Jornada Rezisténsia Uasadiga no governante sira mós mai beibeik haree, maibé Governu la tau ema ruma hodi hein sítiu ida-ne’e. Tuir loloos ne’e, Governu koloka seguransa ruma hodi hein tanba governu gasta ona osan ba sítiu ne’e,” Francisco Melo Cabral ba TATOLI iha Uasadiga, Segunda ne’e.
Veteranu ne’e mós observa katak sítiu turítiku ida-ne’e laiha ema ruma hodi tau-matan hodi hamoos.
Entretantu, sítiu turístiku Jornada Rezisténsia Uasadiga reabilita husi VIII Governu liuhusi Ministériu Turizmu no Ambiente (MTA) ho orsamentu hamutuk $49.730. Konstrusaun hahú iha 11 Novembru 2022 no finaliza iha 06 Dezembru 2023.
Fasilidade sira iha sítiu Uasadiga mak hanesan uma ba rekolla billete, dada bee-moos, eskada liga foho Uasadiga hamutuk haat, sanitária rua, sinál risku, sinál turista no seluk-seluk tan.
Jornalista: Vitorino Lopes da Costa
Editór: Xisto Freitas da Piedade
