DILI, 28 Janeiru 2026 (TATOLI)-Bankada Parlamentár sira destaka vizita ofisiál Primeiru-Ministru Austrália, Anthony Albanese, nakonu ho amizade no reafirma lasu istóriku no hametin parseria entre país rua atu serbisu hamutuk ba dezenvolvimentu moris di’ak povu nian.
Iha sesaun solene Parlamentu Nasionál ba vizita Xefe Governu australianu, Xefe Bankada Partidu Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, iha nia intervensaun hato’o onra boot ba vizita ne’e hodi fahe sentimentu amizade fraterna nian.
“Prezensa ne’e reafirma lasu istóriku ne’ebé kle’an entre ita-nia nasaun rua ne’e. Ita halo ona viajen hamutuk, viajen ida ne’ebé ita hotu hatene, husi tempu krítiku Timor-Leste nia luta ba independénsia, no liuliu situasaun difísil ne’ebé ita hasoru iha tinan 1999 to’o rezultadu istóriku husi estabelesimentu fronteira marítima permanente”, Patrocínio hateten.
Nia espera katak ho vizita Xefe Governu Austrália mai Timor-Leste sei impresionadu ho espíritu dezenvolvimentu ne’ebé evidente duni.
Tuir nia, Austrália nu’udar país viziñu ne’ebé dezenvolvidu, sei kontinua hatudu ninia kompromisu, apoiu no kooperasaun iha área dezenvolvimentu oioin iha Timor-Leste, inklui edukasaun, agrikultura, no formasaun rekursu umanu liuhusi edukasaun no formasaun profisionál no sei kontinua fó oportunidade ba joven timoroan sira atu estuda no hetan serbisu iha Austrália.
Iha fatin hanesan, deputada husi Partidu Frente Revolusionária Timor-Leste Independente (FRETILIN), Nurima Ribeiro Alkatiri, reforsa sesaun ne’e la’ós serimónia de’it maibé reprezenta afirmasaun ida husi diálogu polítiku no respeitu ba malu entre Estadu soberanu sira.
FRETILIN rekoñese Austrália nu’udar Timor-Leste nia parseiru dezenvolvimentu prinsipál dezde restaurasaun no kontribui ona ho signifikativu ba konsolidasaun institusionál, dezenvolvimentu umanu, kapasitasaun no fundasaun sira ba Estadu demokrátiku.
“Oportunidade ne’e atu hafoun kompromisu sira no projeta ita-nia relasaun bilaterál ba iha faze ida ne’ebé maduru liu, estratéjiku no orientadu ba rezultadu sira”, nia afirma.
Tuir nia, vizita Xefe Governu australianu iha signifikadu polítiku no estratéjiku espesiál ho mensajen ida ne’ebé klara kona-ba kompromisu ba kooperasaun, estabilidade no parseria responsavel.
Tanba ne’e, ho kooperasun bilaterál tenke kontinua evolui ba faze estratéjiku liu, foka ba rezultadu sustentavel, diversifikasaun ekonómika, empregu dignu, transferénsia teknolojia ne’ebé efetivu no respeitu ba prioridade soberanu.
Iha sorin seluk, Xefe Bankada Partidu Libertasaun Populár (PLP), Maria Angelina Sarmento Lopes, reforsa vizita ne’e reafirma lasu solidariedade no amizade entre país rua no hafoun ho esperansa. Hodi husu iha futuru presiza hametin kooperasaun bilaterál no kontinua apoiu ba programa sira ne’ebé iha ona. “Ami agradese ba Austrália nia apoiu”, nia hato’o.
Deputadu husi Partidu Demokrátiku (PD), Alexandrino Afonso Nunes, no deputadu Kmanek Haburas Unidade Timoroan (KHUNTO), Antonio Verdial de Sousa, subliña vizita ne’e hametin liután amizade no parseira entre Governu no povu husi país rua.
Kria kooperasaun ho Austrália iha formasaun téknika
Aleinde ne’e, Prezidente Parlamentu Nasionál, Maria Fernanda Lay, sublinña mós atu kria kooperasaun ho Austrália iha formasaun téknika relasiona ho Timor-Leste sai ona membru ba Asosiasaun Nasaun Sudeste Aziátiku (ASEAN, sigla inglés).
Nia dehan, adezaun país nian ne’e reprezenta marku istóriku no oportunidade ne’e rekoñese mós apoiu firme ne’ebé Austrália presta iha prosesu naruk ne’e.
Nia hateten, agora iha faze pós-adezaun, dezafiu sira multíplika implementasaun obrigasaun sira iha país ninia integrasaun iha ASEAN ezije kapasitasaun téknika. “Razaun iha kontestu ne’e, kooperasaun australiana iha formasaun tékniku espesializadu, iha transferénsia koñesimentu no reforsa ita-nia kapasidade instituisionál ne’e esensiál”, nia hato’o.
Notísia relevante: Vizita PM Austrália lori esperansa ba dezenvolvimentu Greater Sunrise
Jornalista: Nelson de Sousa
Editora: Maria Auxiliadora
