DILI, 09 Fevereiru 2026 (TATOLI)—Diretór Servisu Apoiu Diagnóstiku Terapeútiku iha HNGV, Vidal de Jesus Lopes, klarifika infomasaun ne’ebé mak espalla iha mídia sosiál katak Banco de Sangue taka iha fim de semana no halo pasiente sira-ne’ebé presiza raan no to’o mate ne’e hoax (falsa), tanba Konsellu Diretiva Hospitál Nasionál Guido hasai ona sirkulár katak Banco de Sangue funsiona durante oras 24 nia laran.
“Kona-ba Banco de Sangue taka iha fim de semana ne’e kauza ba pasiente balun lakon vida ne’e la loos, tanba Konsellu Diretiva HNGV fó sai ona sirkulár katak laiha diresaun ida iha HNGV mak bele taka ka la funsiona durante oras 24, tanba HNGV hanesan Instituisaun Públíku ida-ne’ebé hala’o nia kna’ar hodi salva ema-nia vida. Tanba ne’e, laiha razaun atu ema ida labele hala’o servisu liuliu Banco de Sangue iha fim de semana,” Vidal de Jesus hateten ba jornalista sira iha nia kna’ar fatin, Bidau, ohin.
Nia esplika, iha sirkulár ne’ebé mak fó sai husi Konsellu Diretivu Hospoitál Nasionál Guido Valadares ne’e klaru katak Banco de Sangue kontinua funsiona durante oras 24 nia laran.
“Sirkulár ne’e klaru. Sirkulár ne’ebé Konsellu Diretiva hasai iha 10 Dezembru 2025 ne’e, hasai ona katak ekipa Banco de Sangue ne’e kontínua funsiona to’o oras 24 nia laran, tantu sábadu no domingu, iha ne’e mákina servisu ne’e la’o oras 24 nia laran. Kualker departementu atu ahi nian ga bee nian ga, halo atendementu ne’e kualker laboratóriu, farmásia ne’e oras 24 nia laran la’o nafatin. Tanba ne’e, relasiona ho ema-nia vida ne’e la’ós servisu loron sorin,” nia dehan.
Nia relata, sistema servisu iha Hospitál Nasionál Guido Valadares ne’e sistema oras 24 hotu kedas, laiha ema ida iha servisu iha ne’e mak hala’o servisu loron sorin de’it, tanba ne’e servisu ne’ebé mak relasiona ho ema-nia vida.
“Sistema iha ne’e oras 24 kedas, non stop, ne’e tenke klaru. Se tékníku ba bee nian, bee ne’e tenke monitoriza hela de’it, funsionamentu bee nian ne’e tenke la’o hela de’it. Ahi nian ne’e mós tenke lakan hela de’it. Laboratóriu mós tenke la’o hela de’it, atu madrugada presiza hasai raan, ema asidente mai hasai raiu-X iha tuku 03:00 madrugada mós tenke hasai, la’ós loron sorin de’it. Mákina ne’e servisu oras 24 nia laran. HNGV nia mekanizmu servisu mak hanesan ne’e,” nia haktuir.
Entretantu, nia haktuir, kona ba estoke raan ne’ebé mak dadauk ne’e disponivél iha Banco de Sangue hamutuk 257.
“Husi numeru ne’e raan mean 165 pakote, raan platelet 17 ne’ebé mak disponivél no plasma 75. Husi númeru preferida kompostu husi grupu raan A 42, B 51, AB 16 0+ 56,” nia dehan.
Jornalista : Felicidade Ximenes
Editór : Cancio Ximenes
