DILI, 16 Marsu 2026 (TATOLI)—Governu liuhusi Ministériu Komérsiu Indústria hamutuk ho setór privadu hala’o koordenasaun atu kontinua asegura presu nesesidades bázika iha Timor-Leste, maske daudaun ne’e mosu funu iha médiu oriente ne’ebé dudu amentu presu mina iha mundu no bele afeta ekonomia globál.
Ministru Komérsiu no Indústria, Nino Pereira, hateten konflitu iha rejiaun médiu oriente fó impaktu ba ekonomia internasionál, inklui aumentu presu mina no mós bele afeta presu sasán nesesidade bázika nian.
“Ita hatene konflitu iha médiu oriente fó impaktu ba ekonomia globál, inklui aumentu presu mina. Maibé to’o agora husi ami-nia monitorizasaun iha kampu no seidauk hetan mudansa iha presu sasán nesesidade bázika ne’ebé presu normá hela,” Ministru Nino Pereira hateten ba jornalista sira iha sekretariadu MKI, Segunda-feira.
Nia hatutan, Governu liuhusi ekipa téknika monitorizasaun direta iha merkadu hodi halo koordonasaun ho distribuitór sira atu garante katak estoke sasán nesesidade baze sei nafatin iha.
Tuir nia, distribuitór sira mós garantia katak estoke (stok) sasán nesesidades bázika sei nafatin iha no presu sei normál iha merkadu, tanba ne’e Governu mós preparadu nia mekanizmu atu hasoru posibilidade aumentu presu wainhira situasaun globál afeta iha merkadu doméstika.
“Se ita detekta aumentu presu, Governu iha mekanizmu atu halo koordenasaun ho partisipasaun husi ema hotu inklui setór privadu, hodi hateten ba públiku no husu komunidade labele pániku. Tanba, konflitu ne’e la’ós de’it afeta ba Timor-Leste maibé afeta rai barak iha mundu,” nia hateten.
Prezidente Kámara Komérsiu no Indústria Timor-Leste (CCI-TL), Jorge Manuel Serrano, hateten situasaun konflitu globál hanesan alerta ba Timor-Leste atu aumenta produsaun agrikola iha rai-laran, tanba Timor-Leste barak liu depende sasán importasaun.
“Ita hatene, ita depende ba sasán importasaun ne’ebé sai nesesidades bázika, entaun dalan ida mak ita tenke aumenta produsaun iha rai-laran, nune’e ita la depende ba importasaun,” nia dehan.
Jorge Serrano hatutan, iha situasaun ida-ne’e ema sira nafatin presiza aihan, tanba ne’e Governu no setór privadu tenke servisu hamutuk iha estratéjia ne’ebé di’ak atu asegura disponibilidade aihan iha rai-laran.
“Konflitu ne’e fó impaktu boot ba mundu, inklui aumentu presu mina no sasán sira seluk. Maibé ha’u konfia Governu iha mekanizmu atu garante estabilidade ekonomia no seguransa aihan iha Timor-Leste sei nafatin,” nia dehan.
Jornalista : Alexandra da Costa
Editór : Cancio Ximenes
