BOBONARU, 17 Marsu 2026 (TATOLI) – Populasaun husi suku tolu hamutuk na’in-115, husi postu administrativu Bobonaru, munisípiu Bobonaru, no postu Atsabe, munisípiu Ermera, ho inisiativa organiza malu hodi loke dalan foun liga husi fatin turizmu bee-tudak Sibi, iha suku Soilesu bá sukun Laubonu no Obulo, ho totál distánsia kilómetru (km) 1,5.
Xefe Suku Soilesu, Marito Victor Pereira, dehan komunidade mai ho isiativa ida-ne’e tanba tempu udan susar tebes atu asesu bá-mai.
Notísia relevante: Populasaun Soilesu labele asesu bá instalasaun saúde no eskola iha tempu udan
“Ne’e hanesan estrada públiku ida. Sira hola inisiativa ida-ne’e para lori produtu lokál asesu bá merkadu ho besik liután”, nia informa ba Tatoli, iha Bobonaru, ohin.
Xefe suku ne’e subliña katak dadaun ne’e autoridade suku prepara ona pedidu atu hato’o ba parte kompetente hodi apoia servisu komunitáriu ne’e.
“Serbisu fíziku la’o ona, ita sei husu apoiu ai-han ruma no ita mós sei husu ba IGEADI atu apoia mákina pezada hodi hakmaan komunidade, tanba agora sira ke’e ho ai-suak, manuál de’it, depois ba futuru ami sei tau prioridade iha PNDS bele fasilita komunidade nia asesu bá-mai”, dehan.
Notísia relevante: Marsu, MOP implementa projetu reabilitasaun estrada rurál kilómetru 16 iha Bobonaru
Jornalista: Sergio da Cruz
Editora: Maria Auxiliadora
