DILI, 23 Marsu 2026 (TATOLI)–Arguidu ho inisiál CdA ne’ebé suspeitu oho nia fen Verónica dos Santos, iha área Praia dos Coquiros, iha Sábadu ne’e, submete ona ba interrogatóriu judisiál dahuluk, iha Tribunál Judisiál Primeira Instánsia Díli.
Iha interrogatóriu dahuluk ne’ebé prezide husi Juíz Estajiáriu Cipriano Sarmento halo uluk identifikasaun ba arguidu nia identidade.
Nune’e, iha sala julgamentu Ministériu Públiku (MP) ne’ebé reprezenta husi Prokuradora Benvida do Rosário, iha nia promosaun promove arguidu CdA ho krime tolu.
Krime ne’ebé MP promove ba arguidu mak krime omesídiu agravadu ne’ebé previstu no punidinu iha artigu 139 husi Kódigu Penál, krime arma branka husi rejime jurídiku prátika arte-marsiál no arma branka husi lei númeru 5/2017 no krime violénsia doméstika husi lei númeru 7/2010.
MP iha nia alegasaun iha interrogatóriu judisiál ne’e solosita ba Tribunál atu aplika Medida Koasaun Prizaun Preventiva tanba arguidu nia aktu ne’e prense ba elementu krime ne’ebé MP promove ba arguidu.
Notísia relevante : PNTL detein suspeitu oho nia feen iha Praia dos Coqueiros
Defeza husi Arguidu CdA, Defensór Públiku Sergio Dias Quintas aseita ho MP nia alegasaun ne’e tanba nia asistidu nia hahalok ne’e priense husi elementu krime omesídiu agravadu.
Defensor Públiku Sérgio Dias Quintas hatutan, nu’udar Defensor Públiku ne’ebé fó asisténsia téknika gratuita ba arguidu CdA aseita MP nia promosaun hodi aplika Prizaun pPeventiva.
“Depois prosesu investigasaun sei la’o hela aban dader tuku 10:00 Otl mak foin bele rona despaixu husi juíz nian, ita hatene katak prosesu investigasaun sei la’o hela, entaun hanesan Defensór Públiku mós asegura buat ida segredu justisa,” nia hateten.
Tanba ne’e, MP nia faktu ne’ebé imputa ba arguidu labele fó sai iha mídia maibé to’o tempu ida bainhira MP halo akuzasaun mak foin bele hatene motivu saida mak arguidu CdA sona nia kaben.
“Ohin ha’u dehan katak tanba segredu justisa, ha’u labele ko’alia buat ruma, soké ohin Ministériu Públiku husu promosaun atu aplika Prizaun Preventiva, tanba ha’u haree nia krime ne’e gravidade tanba omesídiu bazeia ba artigu 183° husi Kódigu Prosesu Penál, entaun ha’u mós aseita promosaun Ministériu Públiku,” nia katak.
Sérgio aprofunda karik juíz konkorda ho MP nia promosaun hodi aplika Prizaun Preventiva, dalaruma ida-ne’e mak di’ak liu atu asegura arguidu depois to’o tempu ida mak haree investigasaun.
“Ohin iha primeiru interrogatóriu nia rasik dehan katak iha altura ne’ebá nia ho kondisaun lanu o que sertu nia la’ós ema ida inputabilidade maibé nia ema normál prátika krime ida-ne’e, ne’e mak ohin realiza Primeira interrogatóriu ne’e,” nia esplika.
Hafoin Tribunál rona tiha parte hotu, Tribunál liuhusi Juíz Estajiáriu Cipriano Sarmento deside hodi adia despaisu ba interrogatóriu judisiál dahuluk ba Arguidu CdA ba fali Tersa (24/03/2026) tuku 10:00 hodi hasai despaisu.
Jornalista : Natalino Costa
Editora : Julia Chatarina
