DILI, 25 Marsu 2026 (TATOLI)—Ronda kualifikasaun ASEAN Hyundai Cup 2026 (uluk ho naran Kampeonatu AFF) sei iha play-off jogu rua entre Brunei no Timor-Leste, no ekipa rua ne’es ei hadau malu molok avansa ba faze grupu nian.
Jogu ida-ne’e determina ekipa finál atu tama iha Grupu A iha torneiu prinsipál, ne’ebé mak hala’o iha loron 24 fulan-Jullu to’o loron 26 fulan-Agostu tinan 2026.
Ajenda Play-Off (Brunei vs Timor-Leste
Jornada primeiru hahú iha loron 02 fulan-Juñu 2026 – Brunei hasoru Timor-Leste.
Jornada segundu iha loron 09 fulan-Juñu tinan 2026 – Timor-Leste hasoru Brunei.
Kontestu Torneiu nian
Husi jogu ne’ebé ekipa rua halo sé mak manán foin tama iha Grupu A, kompostu husi Vietname, Singapura, Indonézia, no Kamboja.
Jogu sira Grupu A nian: Manan-na’in kualifikasaun sei joga dahuluk iha loron 24 fulan-Jullu tinan 2026, hasoru Vietname.
Tasa ASEAN Hyundai 2026 (uluk koñesidu hanesan Kampeonatu AFF ka Tasa AFF) mak kampeonatu futeból mane internasionál ba da-16 iha Sudeste Aziátiku ne’ebé organiza husi Federasaun Futeból ASEAN (AFF). Torneiu ne’e sei marka aniversáriu ba da-30 kompetisaun nian no hetan patrosíniu husi Hyundai.
Hyundai Cup 2026 la hanesan ho edisaun sira uluk, torneiu sei hala’o iha loron 24 fulan-Jullu to’o loron 26 fulan-Agostu tinan 2026. Ida-ne’e sei sai hanesan ba dahuluk torneiu ne’e sei hala’o iha bailoron, envezde iha tinan nia rohan.
Tanba ne’e, Diretór Selasaun Nasionál Federasaun Futeból Timor-Leste (FFTL), João Maneco hateten, Timor-Leste halo ona preparasaun másimu hodi enfrenta jogu kualifikasaun kontra Brunei Darusalam.
“Hasoru Brunei ne’e Hyundai Cup, tuir ranking FIFA ne’ebé ita iha entaun ita tenke tuir lai kualifikasaun. Bainhira ita manán mak foin tama ba jogu grupu, ita tama iha grupu A, jogu kualifikasaun ne’e importante tebes,” Diretór ne’e hateten ba jornalista sira iha edifisiu FFTL Dili, kuarta ne’e.
Jornalista : Hortencio Sanchez
Editór : Cancio Ximenes
