KOVALIMA, 26 Marsu 2026, (TATOLI) – Servisu Saúde Munisípiu Kovalima hamutuk Ospitál referál Suai halo konsulta espesiál ba komunidade Aldeia Holbolu, Suku Beko, Postu Administrativu Suai, Munisípiu Kovalima.
“Atividade konsulta espesiál ida-ne’e Servisu Saúde Munisípiu hala’o kada trimestrál hala’o dala-ida, tinan ne’e ita hahú iha postu Suai, Suku Beko, Aldeia Holbolu, Munisípiu Kovalima,” Diretór Servisu Saúde munisípiu Kovalima, Teófilo Amaral, ko’alia iha aldeia Hobolu, kinta ne’e.
Dirijente Saúde Kovalima ne’e esplika, atividade konsulta espesiál ida-ne’e lori médiku espesialista-sira husi ospital referál Suai hodi lori saúde hakbesik ba komunidade-sira ne’ebé mak dook atu asesu fasilidade saúde.
Ho atividade konsulta espesiál ne’e atu fasilita komunidade sira hodi halo konsulta sira-nia moras, tanba atividade ne’e hala’o dala-haat tanba kada trimestrál hala’o dala-ida, ne’ebé iha 2026 hahú hala’o iha aldeia Holbolu.
Tuir oráriu ba trimestrál daruak sei hala’o iha Postu Administrativu Maukatar sai hanesan alvu ba programa saúde.
Iha atividade konsulta espesiál ne’e, Servisu Saúde Munisípiu Kovalima lori médiku espesialista sira hanesan; espesialista matan, ba labarik, nehan no espesialista sira seluk.
Nia dehan, kona-bá moras ne’ebé pesoál saúde sira rejista aas, seidauk bele hatene, tanba daudaun ne’e médiku no espesialista-sira sei kontinua halo atendimentu ba komunidade sira.
Komunidade Filipina Amaral Perreira, husu atu kontinua halo tratamentu espesiál iha aldeia sira nune’e ferik no katuas sira mós bele konsulta ba sira-nia moras.
“Ha’u hakarak médiku sira mai beibeik hodi halo konsulta ba ami nune’e ami ferik no katuas ne’ebé labele la’o, bele konsulta hodi simu ai-moruk husi médiku sira tuir ami idak-idak nia moras,” nia rekomenda.
Jornalista:Celestina Teles
Editór: Evaristo Soares Martins
