DILI, 09 Abríl 2026 (TATOLI)—Ekipa Timor-Leste konsege konkista nia vitória iha jogu ikus nian iha ASEAN Futsál Championship 2026 bainhira kontra Myanmar ho eskoru 3-1.
Notísia Relevante:
Maske Timor-Leste manán iha jogu ne’e, maibé labele ultrapasa ba faze kuartu finál tanba sofre iha jogu primeiru kontra Tailandia no jogu segundu kontra Vietname iha faze apuramentu grupu.
Jogu ne’ebé Timor-Leste halo kontra Myanmar mak jogu dala ikus liu hodi kompleta jogu ikus faze grupu ne’ebé hala’o iha nasaun Tailándia.
Maske sofre iha jogu rua uluk, maibé jogadór timoroan sira la lakon esperansa, kontinua hatudu jogu ne’ebé di’ak hodi fó vitoria ba Timor-Leste, maske la avansa ba faze sira tuir mai.
Iha jogu dahuluk Timor-Leste luta kontra nia adversáriu Tailándia ne’ebé hanesan uma-na’in, maibé la konsege konkista nia vitória, iha ne’ebé lakon 1-4.
Nune’e, iha jogu daruak kontra Vietname ne’e, Timor-Leste kontinua sofre tan golu 7-1, halo falla kedan Timor-Leste nia jornada hakat ba oin.
Husi derrota dala-rua tutuir malu ne’e mak lori Timor-Leste okupa iha pozisaun ikus liu iha grupu A, maibé iha jogu ikus manán Myanmar Timor-Leste okupa fali pozisaun datoluk ho pontu tolu, enkuantu Myanmar okupa pozisaun ikus liu ho pontu zero.
Ekipa ne’ebé okupa pozisaun dahuluk mak Vietname ho pontu neen ho totál golu 11, iha pozisaun daruak Tailandia ho pontu neen ho golu neen, Timor-Leste iha pozisaun datoluk ho pontu tolu no sofre golu 12, enkuantu Myanmar iha pozisaun ikus liu ho pontu zero no sofre golu sia.
Jornalista : Hortêncio Sanchez
Editór : Cancio Ximenes
