OEKUSI, 13 Abríl 2026 (TATOLI) – Autoridade Protesaun Sívil (APC) Rejiaun Administrativa Espesiál Oekusi Ambeno (RAEOA) hamutuk ho parsériu sira tantu lokál, nasionál no internasionál realiza enkontru aváliasaun serbisu trimestre dahuluk husi Janeiru to’o Marsu 2026 atu prepara planu no estratéjiku atu responde dezastre naturál iha Oekusi.
Enkontru avaliasaun ne’e, partisipa mós husi Autoridade RAEOA, reprezenta husi Diretór Diresaun Rejionál Administrasaun Oekusi, José Tanesib Anunu, konsidera importante atu hadi’a atendimentu ba asuntu dezastre naturál.
“Enkontru avaliasaun ne’e importante, tenke realiza kada trimestre, atu halo planu hodi responde ba asuntu dezastre, entaun liuhusi diskusaun ne’e ita bele haree, saida mak falta tenke hadi’a ba tempu tuirmai, liliu dezastre ne’ebé akontese emerjénsia sira, tanba balun estrada to’os natar, inklui hela fatin,” nia hateten iha edifísiu APC Oekusi, ohin.
Notísia relevante:Janeiru 2026, APC Oekusi rejista dezastre naturál 12 maioria anin sobu uma
Iha biban ne’e, nia enkoraja ekipa APC Oekusi atu kontinua koopera ho autoridade lokál sira, bainhira komunidade afeta dezastre naturál bele hetan informasaun atuál no dadus akontesimentu.
“Durante ne’e ita haree, intervensaun imediata kuandu akontese inundasaun, inséndiu sempre atua kedas, ne’ebé ita espera ba oin presiza mantein esforsa ida-ne’e, atu fó esperansa ba komunidade sira tanba dezastre ita la espera, ne’ebé ita agradese ba ekipa APC tanba bele responde vítima balun bainhira akontese inundasaun husi udan boot, maibé presiza koopera ho autoridade lokál sira atu hetan informasaun ho loloos liliu dadus sira,” nia hateten.
Notísia relevante:Autoridade RAEOA atribui eskritóriu ida ba APC Oekusi atu hala’o serbisu
Iha biban ne’e, Komandante APC Oekusi, João Sila, informa, objetivu husi enkontru avaliasaun ne’e, tanba relasaun ho serbisu ekipa konjunta nian, ne’ebé antes ne’e akontese inundasaun bot iha Oekusi,.
“Durante ne’e ita la’o ho ekipa boot mai husi parseiru sira mak bele solusiona dezastre ne’e, liliu responde emerjénsia hanesan nesesidade báziku, tan ne’e, ita konvida entidade hotu hala’o enkontru avaliasaun atu bele kolabora serbisu hamutuk, ba oin ita bele kontinua fó atendimentu dignu ba vítima sira,” nia hateten.
Notísia relevante:SEPS apoia ekipamentu informátiku no mobiliáriu haforsa serbisu APC Oekusi
Entretantu, parseiriu ne’ebé partisipa iha enkontru avaliasaun ne’e mai husi, OXFAM, CVTL, WN, World Vision, Care Internasionál, no ONG lokál sira hanesan, AFFOS, BIFANO, MANEO, CECEO no PERMATIL inklui RHTO.
Jornalista: Abílio Elo Nini
Editór: Rafael Ximenes de A. Belo
