DILI, 14 Abríl 2026 (TATOLI)—Ekipa Selesaun Garuda Muda Indonézia halakon Ekipa Selesaun Lafaek Timor-Leste 4-1, iha jogu abertura ASEAN Championship Boys 2026 ka Kampionatu ASEAN U-17 Mane 2026 iha Segunda (13 Abril 2026) iha Estádiu Gelora Joko Samudro, Gresik.
Bainhira jogu hahú, iha minutu primeiru kedas ekipa rua lansa kedan kontra no atake ba malu tuir tékniku no abilidade ekipa ida-idak iha.
Maibé Indonézia hatudu kedan nia forsa ho tátiku oioin hodi blokeia Timor-Leste nia jogu, presaun ne’ebé Indonézia halo ikus fó duni rezultadu tanba iha minutu primeira parte Indonézia marka kedan golu haat tutuir malu.
Vitória ida-ne’e marka inísiu pozitivu ida ba ekipa Garuda Muda nian iha sira-nia estreia internasionál. Selesaun Indonézia U-17 nia golu haat marka husi Putu Ekayana Yoga Pratama iha minutu 6 no 17, Ridho iha minutu 36, no Dava Yunna iha minutu 41.
Tama ba segunda parte, ekipa rua kontinua luta maibé la hatudu rezultadu mudansa tanba eskoru mantein 4-0, Timor-Leste esforsu atu marka golu, maibé esforsu hirak ne’e hela de’it hanesan esforsu tanba Indonézia halo blokeia maka’as.
Tanba Indonézia la fó fatin, Timor-Leste mantein nia ritmu halo defensivu oinsá reziste hasoru Indonézia nia jogu, atu nune’e labele aumenta tan golu, nune’e to’o minutu ikus termina rezultadu mantein ho 4-0, vitória monu absolutamente ba Indonézia nia liman.
Rezultadu ne’e, Indonézia no Vietname U-17 sira rua iha pontu tolu ho diferensa golu +4, fahe temporariamente fatin dahuluk iha Grupu A.
Entretantu, Malázia U-17 no Timor Leste iha terseiru no kuartu lugar, seidauk marka pontu ida no iha diferensa golu-4.
Indonézia sei kontinua sira-nia jogu hasoru Malázia iha Estádiu Gelora Joko Samudro iha Gresik iha Kinta-feira (16 Abril 2026) tuku 7:30 kalan oras lokál. Entretantu, Timor Leste sei hasoru Vietname iha fatin hanesan, hahú iha tuku 3:30 oras lokál.
Vitória konvinsente ida-ne’e fó momentum pozitivu ba Garuda Muda tanba sira hein ba sira-nia jogu sira tuir mai iha faze grupu nian.
Jornalista : Hortêncio Sanchez
Editór : Cancio Ximenes
