DILI, 15 Abríl 2026 (TATOLI)-Ministériu Agrikultura, Pekuária, Peska no Floresta (MAPPF), kuarta ne’e, asina memorandu ida ho Rádiu Komunidade sia hodi disemina informasaun jerál kona-ba atividade ministériu nian ba públiku liuhusi Rádiu Komunidade sira.
Rádiu Komunidade sira ne’e mak hanesan Ili Wain-Manatutu, Maliana-Bobonaru, Tatamailau-Ainaru, D. Boaventura-Manufahi, Cova Taroman-Kovalima, Povu Vikeke-Vikeke, Lospalos-Lautein, Lian Matebian-Baukau no Atoni Lifau-RAEOA.
Sekretáriu Estadu Floresta, Fernandinho Vieira da Costa, hateten, objetivu husi MoU ne’e oinsá rádiu komunidade sira bele apoiu serbisu Governu nian liuliu MAPPF nian ba iha setór agrikultura, pekuária, peska, no floresta ne’ebé mak la’o iha territóriu lara
n tomak.
“Objetivu husi akordu ida-ne’e, hametin kooperasaun serbisu entre rádiu komunidade sira iha munisípiu ho ministériu, tanba informasaun ne’e importante tebes maibé, dalaruma komunidade sira durante ne’e ladun asesu ba iha informasaun kona-ba dezenvolvimentu setór floresta no agrikultura, pekuária, no peska”,Fernandinho Vieira da Costa, hateten iha salaun MAPPF, Komoro Dili.
Nia subliña, partisipasaun komunidade iha dezenvolvimentu setór agrikultura ne’e importante tebes nune’e lihuhosi kooperasaun ne’e bele fasilita sira fahe informasaun ba komunidade sira ne’ebé mak moris iha área rurál nune’e sira mós bele partisipa no kontribuisaun ba dezenvolvimentu setór agrikultura iha nasaun ne’e.
Diretór Nasionál Estensaun Formasaun Agríkola, Januario Marçal hateten realiza kooperasaun ne’e tanba, tinan ida-ne’e, iha orsamentu hamutuk rihun $14 ba Diresaun Nasionál Estensaun no Formasaun Agríkola, liuliu Departamentu Mídia Estensaun, atu serbisu hamutuk ho rádiu komunidade sira.
“Ohin asina akordu ida ne’e iha munisípiu sia de’it, maibé iha fulan tolu-haat mai ita sei abranje tan ba munisípiu Likisá, Ermera no Aileu. Hahú husi memorandu ida ne’e, rádiu komunidade sira iha obrigasaun nomós iha responsabilidade hodi fahe informasaun sira ne’ebé mak relasaun ho dezenvolvimentu setór agrikultura”, nia dehan.
Jestora Rádiu Komunidade Baukau, Dulce Santina Belo, konsidera kooperasaun referida di’ak tebes tanba MAPPF hakarak koopera ho Rádiu Komunidade sira oinsá mak atu transmite informasaun sira ne’ebé ministériu ne’e hala’o kada munisípiu.
“Ita apresia tanba bele envolve rádiu komunidade sira oinsá atu partilla informasaun sira tanba dala barak ita haree katak ministériu ne’e sira hala’o serbisu makaas iha baze maibé informasaun falta ba komunidade”, nia dehan.
Entaun ho kooperasaun ida-ne’e fiar katak lihuhosi rádiu komunidade sira-nia partisipasaun iha memorandu ida-ne’e oinsá serbisu hamutuk ho MAPPF kada munisípiu atu bele hatutan informasaun sira ba komunidade iha área rurál.
“Ami garantia katak ho kooperasaun ida-ne’e Diretór Agrikultura munisípiu sira tenke kolabora di’ak ho ami nune’e atividade saida de’it mak sira hala’o bele envolve ami”, nia konklui.
Jornalista: Arminda Fonseca
Editór: Rafael Ximenes de A. Belo
