DILI, 27 Abríl 2026 (TATOLI)—Ministériu Asuntu Kombatente Libertasaun Nasionál ho Komité 12 Novembru kontinua esforsu hodi buka solusaun ba konstrusaun Memoriál 12 Novembru Santa Krús ne’ebé mak to’o agora seidauk finalizadu.
“Tanba saida mak ami buka malu? Ami buka malu atu buka dalan hodi fó solusaun. Baibain ha’u dehan tiha ona katak asuntu ida Monumentu 12 de Novembru difisil liu funu 24, maibé ami nafatin halo esforsu atu buka solusaun. Ne’e hakarak ka lakohi tanba devér moris sira-nian atu husik hela memória ba sira-ne’ebé mak laiha tiha ona hodi husik hela ba jerasaun sira tuirmai,” Ministru Asuntu Kombatente Libertasaun Nasionál, Gil da Costa “Oan-Soru” dehan ba jornalista sira iha kna’ar fatin, Segunda ne’e.
Oan-Soru dehan razaun kona-ba foti desizaun ba rate Santa Krús ne’e difísil tanba rate ida Santa Krús ba sobu ne’e la fásil.
“Rate ida Santa Krús, ita ba sobu ne’e fásil ka? imi na’in hirak túr ne’e kultura Timor imi iha ka lae? depoiz Santa Krús ne’e hakoi ema primeiru ne’e sá tinan, ne’ebé la fásil ne’ebé tenke halo buat hotu-hotu, entaun nia difísil liu funu,” governante ne’e haktuir.
Notísia relevante: Konstrusaun Memoriál Santa Krús, MPIE hein MAKLN aprezenta orsamentu adisionál
Tanba ne’e, nia hatutan, nia la garante katak tinan-ne’e atu finaliza maibé parte rua nafatin esforsu buka solusaun ba obra referida.
“Ha’u la garante ba ita-boot sira iha tinan ida-ne’e. Ohin 27 Abríl, hela de’it fulan ualu (8) iha tinan-ne’e hotu ona. Ne’ebé, ha’u garante ba ita-boot sira signifika ita bosok nasaun. Ida-ne’e ha’u lakohi, más ein-prinsípiu ami iha kompromisu no ami ko’alia nafatin para buka dalan hotu, hodi buka solusaun,” nia afirma.
Iha fatin hanesan, Prezidente Komité 12 Novembru (K12N), Gregório Saldanha, hateten obra Memoriál 12 Novembru Santa Krús paradu ne’e kompeténsia iha Ministériu Asuntu Kombatente Libertasaun Nasionál (MAKLN) nia liman.
“Obra Memoriál 12 Novembru Santa Krús ne’e paradu tinan barak ona, no tanbasá la la’o ne’e ami diskute hela ho Ministru Asuntu Kombatente Libertasaun Nasionál atu buka dalan atubele la’o bá-oin. Ami hanesan benefisiáriu lakohi obra ne’e paradu. Ho ida-ne’e, ami fó kompeténsia tomak ba ministru atu foti desizaun. Ami-nia suspirasaum mak ne’e, obra ne’e kle’ur demais ona, ne’ebé Ministériu mak na’in ba obra ne’e, ne’ebé nia mak ko’alia ho empreza konstrutór atu buka solusaun. Tanba agora empreza la halo ona servisu,” nia dehan.
Orsamentu ne’ebé aloka ba konstrusaun Monumentu Santa Cruz ka Memoriál 12 Novembru ne’e hamutuk $1.385.389,88.
Konstrusaun hahú iha loron 22 Setembru 2021 to’o 22 Setembru 2022 maibé seidauk konkluidu, nune’e Governu liuhusi Ministériu Asuntu Kombatente Libertasaun Nasionál (MAKLN) prolonga to’o tinan 2023 maibé seidauk hetan konkluzaun nafatin to’o ohin loron.
Jornalista: Osória Marques
Editór: Xisto Freitas da Piedade
