OEKUSI, 07 Maiu 2026 (TATOLI) – Sekretáriu Rejionál Administrasaun no Asuntu Finansa, Salvador da Cruz, reprezenta Prezidente Autoridade Rejiaun Administrativa Espesiál Oekusi Ambeno (RAEOA), kinta ne’e, hatuur ona fatuk-inan ba projetu Programa Nasionál Dezenvolvimentu Suku (PNDS) tinan fiskál 2026 nian, iha bairru Nefokisan aldeia Postu-Sika suku Lifau sub-rejian Pante Makasar.
Projetu referidu, nu’udar prioridade ba suku Lifau iha 2026 ne’e, maka reabilitasaun estrada ho betaun metru-600 no britas metru-300 kompleta ho morru satan rai metru-186.
Notísia relevante:Tinan ne’e, PNDS Oekusi sei ezekuta projetu 22 ho kustu rihun $900-resin
Iha ámbitu seremónia lansamentu ne’e, Sekretáriu Rejionál Administrasaun no Asuntu Finansa, Salvador da Cruz, fó hanoin ba ema hotu atu tau matan, tanba fundu ne’ebé aloka ba projetu referidu, propoin rasik mai husi suku la’ós nasionál.
“Bainhira projetu ida mai iha ita-nia suku, ita tenke tau matan, tanba PNDS ne’e, ita rasik prioriza atu halo iha ita-nia suku ho kedas nia orsamentu,” nia hateten iha seremónia lansamente ne’e.
Eis-Administradór Oekusi ne’e, rekomenda ba Autoridade Komunitária sira liliu xefe suku no aldeia inklui delegadu sira, presiza promove liña koordenasaun ho komunidade sira atu labele hamosu impedimentu, maibé presiza hamutuk atu alkansa prosesu dezenvolvimentu iha suku.
Notísia relevante:Ezekusaun fundu PNDS ba projetu 24 iha Oekusi atinje ona 96%
Iha biban ne’e, Diretór PNDS Oekusi, João Bobo, relata, projetu prioridade PNDS 2026 ba Oekusi hamutuk 23 ho fundu infraestrutura rihun $931.000.00, kobre ba suku 20 no sub-rejionál haat.
“Ohin ita hahú ona lansamentu primera pedra ba projetu PNDS RAEOA anu fiskál 2026 nian, ne’ebé iha hahú uluk iha Pante Makasar ba projetu 11, tanba projeru prioridade tinan ne’e ba suku 20 no sub-rejiaun haat hamutuk projetu 23, ne’ebé aban kontinua lansa ba Nitibe, depois Pássabe ikus iha sub-rejiaun Oésilo,” nia hateten.
Xefe Suku Lifau, Delfino Sole, agradese ba Governu no promete sei koopera, nune’e obra ne’e bele finaliza tuir durasaun serbisu.
“Projetu ida-ne’e la’ós ha’u xeef suku mesak mak husu, maibé povu suku Lifau tau hamutuk hanoin, katak tinan ne’e fó prioridade ba aldeia Postu-Sika, tinan tuir mai sei ba fali aldeia seluk, ne’ebé ami tenki tau matan, tanba ami rasik mak hakarak dezenvolvimentu mai ami nia suku, ha’u garante sei laiha impedimentu ba prosesu konstrusaun,” nia katak.
Notísia relevante:PNDS introdús manuál operasaun ba entidade relevante iha Oekusi
Entretantu projetu ne’e, implementa husi Ekipa Jestaun Suku hamutuk ho komunidade sira, ho fundu rihun $44,250.00 no durasaun serbisu fulan haat.
Jornalista: Abílio Elo Nini
Editór: Rafael Ximenes de A. Belo
