Fundu Mina-rai Timor-Leste rejista rendimentu negativu tanba konflitu iha Médiu Oriente

Diretór-Ezekutivu BCTL, Tobias Ferreira, akompaña husi Analista Risku BCTL, Elígia A. de Almeida (liman-loos) no Analista husi Ministériu Finansa, Cosme da Costa, (karuk) iha konferénsia imprensa kona-ba relatóriu Fundu Petrolíferu iha salaun BCTL, Dili, 08 Maiu 2026. Foto TATOLI/António Daciparu.

DILI, 08 Maiu 2026 (TATOLI)-Banku Sentrál Timor-Leste (BCTL, sigla portugés) fó sai katak konflitu iha Médiu Oriente afeta ba dezempeñu investimentu Fundu Petrolíferu Timor-Leste iha trimestre dahuluk tinan 2026, rezulta rendimentu investimentu brutu negativu hamutuk millaun $97,72.

Diretór-Ezekutivu BCTL, Tobias Ferreira, relata katak relatóriu Fundu Mina-rai ba trimestre dahuluk hahú husi Janeiru to’o 31 Marsu 2026 hatudu katak kapitál/balansu Fundu Petrolíferu billaun $18,31, tun kompara ho billaun $18,61 iha trimestre dahaat tinan 2025.

Relatóriu ne’e mós hatudu totál reseita Fundu Petrolíferu simu iha trimestre ne’e hamutuk millaun $4,50, númeru ida-ne’e la’ós afeta husi konflitu iha Médiu Oriente, maibé ida-ne’e reseita ne’ebé mai husi empreza petrolífera nian.

Diretór-Ezekutivu BCTL, Tobias Ferreira, akompaña husi Analista Risku BCTL, Elígia A. de Almeida (liman-loos) no Analista husi Ministériu Finansa, Cosme da Costa, (karuk) iha konferénsia imprensa kona-ba relatóriu Fundu Petrolíferu iha salaun BCTL, Dili, 08 Maiu 2026. Foto TATOLI/António Daciparu

“Agora, iha parte seluk ne’ebé ami sita mak rendimentu brutu investimentu hetan negative $97,72 tanba hetan influensia husi kondisaun jeopolítika no konflitu sira iha Médiu Oriente, ne’ebé fó impaktu ba merkadu finanseiru globál sira”, Tobias Ferreira hateten ohin.

Nia esplika katak BCTL rejista rendimentu investimentu brutu menus millaun $97,72, kompostu husi funan, kupaun, no dividendu millaun $131,98, maibé hetan diminuisaun iha valór merkadu millaun $229,70.

Nune’e, retornu Fundu Mina-rai durante trimestre dahuluk ida-ne’e husi merkadu finanseiru mak -0,62% komprara ho ninia referénsia -0,69%.

Nia akresenta katak iha trimestre ida-nee totál osan ne’ebé dada sai osan husi Fundu Mina-rai hamutuk millaun $204,18, ne’ebé millaun $200 transfere ba konta tezouru atu finansia orsamentu Estadu, enkuantu millaun $4,18 uza ba selu kustu jestaun investimentu.

Tobias hateten dezde Fundu Petrolíferu nia estabelesimentu, totál reseita aproximadamente billaun $25,29, enkuantu totál returnu husi investimentu iha merkadu finanseiru hamutuk billaun $11,93, ho retornu média anuál pursentu 4,67. Totál levantamentu husi Fundu Petrolíferu hodi finansia Orsamentu Estadu hamutuk billaun $19,06.

Notísia relevante: Dezde estabelese Fundu Mina-Rai rejista reseita billaun $25,29 no retornu $11,93

Jornalista: Arminda Fonseca

Editora: Maria Auxiliadora