DILI, 29 Maiu 2026 (TATOLI) – Bankada opozisaun FRETILIN preokupa ho orsamentu Ministériu Negósiu Estranjeiru no Kooperasaun (MNEK) ne’ebé hetan korte $213.959, tanba bele fó impaktu ba serbisu misaun diplomátika iha rai-li’ur.
Liuhusi debate espesialidade, FRETILIN hato’o proposta hodi husu mantein orsamentu inisiál $36.334.526, tanba haree ba serbisu MNEK nian ne’ebé importante tebes, tanba liga ba diplomasia, liuliu Timor-Leste ne’ebé tama ona ASEAN.
“Iha orsamentu ba MNEK ne’e ami hakarak mantein labele korta valór $213,959, tanba durante ami-nia observasaun MNEK ninia serbisu diplomátiku ne’ebé todan, barak tebes, inklui serbisu konjunta ho ASEAN. Ita sai tiha ona membru ASEAN mak osan ne’e ita hasai tiha fali, ida-ne’e afeta ba serbisu diplomátiku”, deputadu Florentino Sinarai hateten iha debate espesialidade ba Orsamentu Retifikativu (OR), iha Parlamentu Nasionál, ohin.
Hatán ba kestaun ne’e, deputadu husi bankada CNRT, Domingos Agusto Deker, hateten korte verba ba MNEK nian, iha inisiu sira mós preokupa tanba programa sira ne’ebé iha bele afetadu. “Maibé depois rona esplikasaun no justifiksaun sira husi Governu, ha’u mós konxiente katak akontese iha OR ne’e hanesan kompromisu internál Governu nian”, dehan.
Tanba ne’e mak ho konsiderasaun ida-ne’e, Governu rasik kompromete katak se akontese problema ruma ba ministériu, Ezekutivu iha kompromisu atu halo jestaun interna. “Ita entrega kompeténsia tomak ba Governu deside”, katak.
Primeiru-Ministru, Xanana Gusmão, agradese ba preokupasaun sira kona-ba serbisu MNEK nian, liuliu liga ba Timor-Leste nia integrasaun ba ASEAN ne’e, maibé orsamentu ba ASEAN nian tau ona iha dotasaun Governu hodi responde.
“Tanba espíritu Orsamentu Retifikativu ne’e la hasai tan husi Fundu Mina-rai, maibé iha de’it reajustamentu hanesan hasai de’it husi ministériu sira seluk. Ha’u atu dehan de’it katak iha dotasaun Governu kontempla mós atividade polítika esterna, ne’ebé lalika preokupa barak kona-ba ida-ne’e”, Xanana afirma.
Jornalista: Arminda Fonseca
Editora: Maria Auxiliadora
