DILI, 01 Juñu 2026 (TATOLI)–Klube Husi Munisípiu Ermera ho naran istimadu Weasel FC prontu atu enfrenta teste todan hasoru Hibers Dili FC, iha jogu kontinuasaun Liga Futebol Timor-Leste (LFTL) Segunda Divizaun 2026 ne’ebé sei realiza iha Estádiu Munisipál Dili, tersa kalan.
Jogu ida-ne’e importante tebes ba ekipa rua atu mantein esperansa sa’e ba Primeira Divizaun iha époka oin.
Jerente Weasel FC, Leandro Imaculada Soares, hateten ninia ekipa halo preparasaun másimu atu hasoru jogu tuir mai. Maske iha loron horisehik empata ho AC Mamura, maibé sei esforsu atu manán iha jogu kontra Hibers.
“Ami hatene Hibers ekipa forte. Sira iha jogadór ho esperiénsia barak no atake lalais. Maibé ami mós serbisu maka’as. Kondisaun fíziku jogadór di’ak, tátika ami estuda ona. Ha’u bele dehan ami prontu 100% atu hasoru sira,” Jerente ne’e hateten liuhusi konferensia imprensa ne’ebé realiza iha Estádiu Munisipál Dili, segunda ne’e.
Dadaun ne’e, iha tabela klasifikasaun provizóriu ne’e, Weasel foin mak rekolla pontu ida husi joga dala ida kontra AC Mamura maibé empta 1-1.
Hibers la hakfodak ho Weasel
Husi sorin seluk, treinadór Hibers, José Moniz de Jesus, mai ho konfiansa katak ninia jogadór sira sei hatudu rezultadu di’ak iha jogu kontra Weasel.
“Mai ami prepara hanesan baibain, tempu joga mós besik loos. Ami prepara atu rekolla pontu tolu iha jogu ne’e. Ha’u konfia jogadór sira,” treinadór ne’e dehan.
Iha jogu primeiru, nia haktuir, empata ho Ponta Lica-Lica Lemorai 2-2 no jogu segundu manán 3-0 kontra Académica. Tanba ne’e, nia fiar katak iha jogu terseiru ne’e ekipa sei hadi’a fallansu sira no tenke konkista vitória.
Maibé nia mós rekoñese katak Weasel FC hanesan mós ekipa ne’ebé forte no sira tenke servisu maka’as atu bele manán.
Fatór seluk mak finalizasaun, nune’e ekipa rua tenke aproveita oportunidade tanba iha Segunda Divizaun ne’e, dala barak jogu deside ho golu ida (1) de’it.
Jornalista : Hortêncio Sanchez
Editór : Cancio Ximenes
