OEKUSI, 02 Juñu 2026 (TATOLI) – Diresaun Nasionál Serbisu Água Saneamentu (DNSAS), tersa ohin, entrega relatóriu avaliasaun kompeténsia bee-rurál ba Autoridade Rejiaun Administrativa Espesiál Oekusi Ambeno (RAEOA) ho rekomendasaun pontu prinsipál ualu, presiza konsidera hanesan referénsia hodi ajusta iha Planu Asaun Anuál (PAA) atu hadi’a jestaun no kapasitasaun kona-ba asuntu bee-rurál iha Oekusi.
Jaime Mendonça, hanesan tékniku husi DNSAS, hato’o rekomendasaun sira-ne’e, durante aprezentasaun rezultadu avaliasaun kompeténsia bee-rurál iha salaun Gabinete Prezidente Autoridade RAEOA, tersa ohin.
Nia hateten, rezultadu avaliasaun kompeténsia ne’e, antes ne’e hala’o iha munisipíu Bobonaru iha fulan-Novmebru 2025, kona-ba bee-rurál sira, hanesan Serbisu Munisipál Água Saneamentu no Ambiente (SMASA) no Diresaun Serbisu Água Seneamentu Oekusi nian.
Notísia relevante:BTL destaka funsionáriu iha Lakluta hodi kontrola fornesimentu bee-moos ba komunidade
Rekomendasaun ualu ne’ebé presiza Autoridade konsidera maka hanesan, primeiru haforsa treinamentu tékniku iha sistema bee-rurál saneamentu teste kualidade bee no tratamentu lixu líkidu.
Daruak, presiza hadi’a kapasidade administrativu, estrutura insentiva GMF no koordenasaun inter-institusionál, datoluk, hasa’e koñesimentu ba prátika liuhusi simulasaun, mentorizasaun no ezersísiu prátiku, dahaat, mantein dezempeñu forte iha operasaun rutina no envolvimentu komunidade.
Dalima, fornese ferramenta no materiál apoia atu fasilita implementasaun serbisu, daneen uza planu dezenvolvimentu kapasidade hanesan baze ba Planu Asaun Anuál (PAA) no apoiu parseiru sira, dahitu haforsa propriedade institusionál liuhusi validasaun, diseminasaun no responsabilidade klaru, no pontu ikusliu hala’o aváliasaun kompeténsia foun iha tinan ida to’o rua, nune’e bele monitoriza progresu.
Planu Kapasitasaun
Iha biban ne’e, DNSAS propoin ba SMASA ida-idak dezenvolve ona sira nia planu kapasitasaun ba tinan-tolu nian iha prosesu identifikasaun forsa no prioridade durante hala’o avaliasaun kompeténsia ho funsaun prinsipál tolu husi planu kapasitasaun ne’e maka:
- Sai referénsia ba SMASA bainhira prepara Planu Asaun Annuál.
- Sai referénsia hodi diskute ka koordena ho parseiru sira kona-ba suporta kapasitasaun ba área sira-ne’ebé identifika hanesan prioridade.
- Autoridade munisipíu iha koñesimentu hodi suporta katak planu kapasitasaun SMASA nian maihusi prosesu avaliasaun kompeténsia nian no bele konsidera hanesan prioridade iha PAA Autoridade munisipál nian.
“Objetivu husi avaliasaun kompeténsia ne’e, hanesan referénsia ida, atu fasilita kargu xefia sira iha Oekusi, hodi utiliza no dezeña iha sira-nia Planu Asaun Anuál (PAA), tanba iha prosesu avaliasaun sira-ne’e, ho intensaun atu eleva nafatin ita-nia funsionáriu sira-nia koñesimentu no abilidade sira liliu asuntu bee rurál sira, tanba durante prosesu avaliasaun, parte SAS nasionál deteta irregularidade barak mak akontese iha RAEOA liga ho serbisu tékniku,” nia hateten iha salaun Gabinete PA RAEOA Oekusi, ohin.
Tuir nia, planu avaliasaun kompeténsia ne’e atu identifika prioridade sira inklui forsa traballu, nune’e rezultadu husi avaliasaun sira-ne’e, bele sai hanesan referénsia ida, nune’e bele ajusta iha Planu Asaun Anuál.
Notísia relevante:PNDS rekomenda ba BTL,E.P garante kualidade projetu bee-moos
Diretór Diresaun Rejionál, Serbisu Água Saneamentu Oekusi, José Ili orgullu tanba relatóriu avaliasaun ne’ebé halo iha tinan kotuk iha munisípiu Bobonaru, ho objetivu atu sai referénsia ba RAEOA, nune’e bele hadi’a iha futuru.
“Ohin ita simu ona relatóriu ne’e, ne’ebé avalia iha tinan kotuk, hodi avalia Serbisu Munisipál Água Saneamentu no Ambiente iha kada munisipíu, tanba problema barak maka ita enfrenta iha Oekusi, maka rekursu umanu presiza aumenta, presiza formasaun no kapasitasaun ba funsionáriu sira liliu iha parte téknika no kanalizasaun, atu sira bele utiliza hodi bele atende komunidade sira, atu halo manutensaun ba iha sistema bee-rurál sira, ne’ebé ita agradese, tanba iha pontu ualu mak bele sai referénsia atu integra iha planu asaun tinan oin,” nia hateten.
Notísia relevante:Austrália apoia ekipamentu ba MOP hodi dezenvolve infraestrutura estrada no bee-moos
Jornalista: Abílio Elo Nini
Editór: Rafael Ximenes de A. Belo
