DILI, 02 Juñu 2026 (TATOLI)—Seleasaun Nasionál Timor-Leste “LAFAEK” bahat istória foun hafoin halakon Brunei Darussalam ho rezultadu golu 3-0 iha jogu Playoff ASEAN Hyundai Cup 2026, iha Sultan Hassanal Bolkiah Stadium, Brunei, tersa kalan.
Jogu ne’e hanesan faze primeiru no iha 09 fulan-Juñu ne’e nasaun rua sei kontra malu dala ida tan. Bainhira Timor-Leste mantein nia vitória, Timor-Leste mak sei faze grupu kompetisaun prinsipál ASEAN nian. Maibé iha jogu daruak mak Brunei manán ho rezultadu boot kompara ho Timor-Leste mak Brunei mak sei avansa ba oin.
Iha jogu ne’e, hatudu loloos no hatudu momoos katak, João Rangel, Zenivio Mota, no Oatnasio Guterres sai eroi foun iha jogu refere liuhusi hatama golu ho ema ida golu ida.
Jogu desizivu ne’e realiza iha Sultan Hassanal Bolkiah Stadium ho prezensa adeptu Timoroan balu ne’ebé fó apoiu másimu ba ekipa LAFAEK. Treinador José Pedro Salazar hatama jogadór 11 prinsipál forte ho ambisaun atu hakerek istória foun ida iha mundu futeból.
Ho nune’e, Timor-Leste hahú jogu ho konfiansa. Presaun aas husi minutu primeiru rezulta golu abertura iha minutu 28. Médiu João Rangel konsege finaliza jogada koletiva furak husi liña klaran, lansa Timor-Leste ba oin ho golu 1-0. Golu ne’e halo ekipa Brunei lakon konsentrasaun.
Ekipa Lafaek kontinua domina, iha leet balun LAFAEK hetan penalidade iha minutu 41 hafoin avansadu Timor-Leste hetan karega iha área penalidade. Kapitan Zenivio Mota avansa no ezekuta ho kalma, vinga guarde rede halai ba sorin karuk no bola duir tama husi sorin seluk hodi muda rezulatdu ba 2-0. Rezultadu ne’e mantein to’o jogadór sira tuun bah emu bee.
Iha segunda parte, Brunei tenta aumenta rítmu atake hodi buka redús dezvantajen, maibé liña defeza TL ne’ebé lidera husi jogadór Eric Tomas no Jackson Pereira joga dixiplina tebes.
Iha minutu ikus tempu kompensasaun 90+3’, Timor-Leste taka konta liuhusi kontra-atake lalais. Substitutu Oatnasio Guterres simu bola husi Zenivio Mota no xutu maka’as husi li’ur área laran tama rede, 3-0. Estádiu nakfera ho festa husi jogadór no adeptu Timo oan sira.
Ho vitória 3-0 ne’e, Timor-Leste iha ona zona aman oinsa hakat ba faze grupu ASEAN Hyundai Cup 2026 ne’ebé sei termina iha jogu ikus ne’ebé hala’o semana oin, bainhira Timor-Leste mak hetan rikete atu tama, sei hamutuk ho nasaun sira, Tailándia, Vietname, Indonézia no Malázia.
Jornalista : Hortêncio Sanchez
Editór : Cancio Ximenes
