MAPPF lansa ró haat hodi halo atividade peska iha kosta súl
DILI, 20 Jullu 2026 (TATOLI)-Ministériu Agrikultura, Pekuaria, Peska no Floresta (MAPPF) lansa ró fiberglass haat hodi halo atividade peska iha tasi kosta súl.
Lansamentu ba ró sira ne’e realiza iha edifísiu Unidade Polísia Marítima (UPM), Dili, husi Primeiru-Ministru, Xanana Gusmão, Vise-Primeiru-Ministru ba Asuntu Sosiál no Ministru ba Dezenvolvimentu Rurál no Abitasaun Komunitária, Mariano Assanami Sabino, Ministru Agrikultura, Pekuária, Peska no Floresta, Marcos da Cruz, no konvidadu sira seluk.
Ministru Marcos da Cruz hateten katak ró ida ministériu sosa ho Orsamentu Jerál Estadu (OJE) 2024 ho nia kapasidade 5 gross ton. Ró rua seluk ho nia kapasidade 5 gross ton no 17 gross ton nia na’in mak empreza Rayhana no ró ida ho kapasidade tonelada 10 husi empreza Comodities X-Change Lda.
“Objetivu husi lansamentu ne’e mak atu hatudu katak ita komesa book iha setór peska, ka’er ikan iha ita-nia tasi”, nia hateten.
Governante ne’e dehan Timor-Leste iha poténsia boot atu esplora, tanba tasi iha liña kosteira kilómetru 735.000, área zona ekonomia eskluziva hamutuk kilómetru 72.000, iha ona poténsia estimativa ikan boot iha tasi laran kuaze iha tonelada hamutuk 718.900.
Nia salienta katak husi poténsia ne’ebé iha, to’o agora Timor-Leste foin uza 2%, kuaze 20% husi poténsia ne’e lakon tanba iha atividade peska ilegál ne’ebé akontese iha tasi Timór.
“Nune’e, lansamentu ida-ne’e importante tebes atu fó oportunidade ba ita-nia empreza nasionál ne’ebé hakarak atu envolve no kontribui ba dezenvolvimentu peska nian. Ita fó atu sira tama daudaun ita-nia tasi, liuliu iha área kosta súl nian”, dehan.
Primeiru-Ministru, Xanana Gusmão, hateten ró sira ne’e bele tulun no dudu ekonomia. Biban ne’e, nia bolu atensaun ba empreza, liuliu prepara fatin prosesamentu no armazenamentu ne’ebé di’ak bainhira ka’er ikan hafoin fa’an fali hodi garante kualidade produtu ba sidadaun sira atu konsumu. Tanba, Xefe Governu preokupa ho vendedór barak fa’an ikan iha fatin-fatin la organizadu.
Jestór kompañia Rayhana, Ricardo Nheu, hateten empreza iha ona fábrika kona-ba ai-han ki’ik ligasaun ho ikan, prepara halo mós sala malirin hodi rai ikan labele aat.
“Ikan ne’e nia funsaun barak ba populasaun, folin tuir merkadu hodi fasilita kompradór sira atu sosa, nune’e mós sai komoditi ne’ebé esporta”, katak.
Operadór ba ró sira ne’e mai husi rai-li’ur, tanba kompañia koopera ho país Vietname, Indonézia no Xina. Sira sei sai hanesan instrutór atu treina mós timoroan sira aprende, hafoin ba oin bele halo operasaun rasik. Tuir planu, kompañia sei aumenta tan ró haat.
Jerente empreza Comodities X-Change Lda., Martinho Martins, agradese ba Governu Dasiak, liuliu MAPPF tanba foin ba dahuluk empreza timoroan halo investimentu iha setór peska.
Jornalista: Nelson de Sousa
Editora: Maria Auxiliadora
