MAE aprezenta kona-ba transladasaun restu mortál bispu na’in-tolu ba KM
DILI, 22 Jullu 2026 (TATOLI)—Ministru Administrasaun Estatal, Tomás do Rosário Cabral, aprezenta kona-ba vizita ofisiál ba Portugál no serimónia sira ba transladasaun restu mortál husi Amu-lulik no Bispu saudozu sira, ne’ebé sira-nia sakrifísiu, dedikasaun no sasin esperansa nian nu’udar baze iha ne’ebé igreja iha Timór hamriik to’o ohin loron.
Nia mós aprezenta kona-ba serimónia ba transladasaun restu mortál husi Amu-lulik no Bispu saudozu sira-– Dom Jaime Garcia Goulart, Dom José Joaquim Ribeiro, Monseñór Martinho da Costa Lopes no Dom Alberto Ricardo da Silva – bibi-atan sira ne’ebé, ho korajen no domin, akompaña ita-nia povu iha momentu susar liu iha istória.
Atu lori sira-nia restu mortál mai Timor, Governu reafirma ninia kompromisu atu kontinua sira-nia legadu iha rekonsiliasaun no konstrusaun ba nasaun Timor-Leste.
Ministru Tomas Cabral mós informa ba Konsellu Ministru kona-ba rezultadu vizita ofisiál ba Repúblika Portugál, iha ne’ebé estabelese entendimentus hodi hametin kooperasaun bilaterál iha área simplifikasaun no modernizasaun administrativa, administrasaun eleitorál no prezervasaun patrimóniu arkivu militár ne’ebé komún ba nasaun rua ne’e.
Aleinde ne’e. nia mós aprezenta rezultadu husi konferénsia Nasaun Unida nian relasiona ho Reforma Governu Lokál iha Jeórjia ba Konsellu Ministru.
Kona-ba MAE nia partisipasaun iha Konferénsia Naaun Unida nian relasiona ho reforma Governu lokál, iha ne’ebé Estadu partisipante sira fahe esperiénsia no prátika di’ak sira nomós promove reforsu kooperasaun internasionál iha área modernizasaun administrativa, inovasaun iha setór públiku no governasaun lokál.
Jornalista : Alexandra da Costa
Editór : Cancio Ximenes
