BAUKAU, 23 Jullu 2026 (TATOLI)—Kompañia responsavel hahú mobiliza ekipamentu pezadu hodi reabilita estrada Diresaun Kaisidu, Kaibada to’o Rotunda Vila Antiga, Ro-ulo, Suku Bahú, Postu Administrativu Baukau Vila.
Xefe Suku Kaibada, Cosme da Costa Lopes, esplika projetu reabilitasaun estrada referida nu’udár parte kontinuasaun husi projetu anteriór iha-ne’ebé kompañia responsavel hahú hala’o serbisu iha terrenu hafoin ramata serimónia kulturál hanesan parte husu lisensa iha semana-ne’e.
“Hafoin ramata serimónia kulturál husi lian-na’in sira, kompañia komesa kedas halo serbisu iha terrenu,” Xefi suku Kaibada informa ba Agênsia TATOLI liuhosi telefonema, Kinta ne’e.
Cosme Lopes relata projetu referidu nu’udár parte resposta husi Governu kona-ba komunidade liuliu área Suku Kaibada ne’ebé durante ne’e halerik ba dezenvolvimentu liuliu infraestrutura bázika hanesan estrada ne’ebé kategoria grave no presiza atu hetan atensaun.
Aleinde ne’e, nu’udár autoridade lokál sei kontinua halo aprosimasaun no fahe informasaun liuliu relasiona ho uma komunidade ne’ebé sei afeta ba prosesu implementasaun projetu referidu tanba husu komunidade koopera hodi aselera lalais serbisu iha terrenu.
“Ita seidauk halo levantamentu dadus tanba sei hein kompañia identifika depoiz aprezenta ba autoridade suku mak foin hatene,” Cosme Lopes akresenta.
Líder Kaibada ne’e hato’o mensajen ba komunidade atu kolabora tanba la’ós ona tempu atu halo impedimentu maibé tempu atu halo dezenvolvimentu iha-ne’ebé estrada diresaun referida ho medida luan metru ualu kompostu husi metru neen aspál no metru rua utiliza ba trotoár.
Entretantu, projetu kontinuasaun reabilitasaun estrada iha área referida hamutuk kilómetru 11 kompostu husi kilometru ualu husi diresaun Uaibua, Kaisidu to’o Rotunda Vila Antiga no kilómetru tolu husi área Lesi, Kaisidu ba Triloka ne’ebé responsabiliza husi JOVA no Planaltu STAR durasaun tinan-ida ho orsamentu purvolta millaun $6.
Jornalista: Natalino Belo
Editór: Xisto Freitas da Piedade
