Xanana konsidera Sentru Espiritualidade Inaciana sai fatin promove kultura diálogu
DILI, 31 Jullu 2026 (TATOLI)–Primeiru-Ministru, Kay Rala Xanana Gusmão, ofisialmente inaugura Sentru Espiritualidade Inaciana ba Dame no Rekonsiliasaun ne’ebé konsidera hanesan fatin atu forma konsiénsia no promove kultura diálogu relijioza nian.
Primeiru-Ministru, Kay Rala Xanana Gusmão, hateten ohin loron la’ós de’it abertura edifísiu foun ida maibé mós sai sinál ida atu reafirma kompromisu hametin valór fiar, dame, solidariedade no respeitu bá ema hotu, tanba istória Timor-Leste hanorin katak dame la mai ho fásil.
“Dame presiza sakrifísiu, perseveransa, perdaun no vontade atu rekonstrui relasaun entre ema sira,” Primeiru-Ministru Xanana Gusmão hateten iha ámbitu inaugurasaun sentru espiritualidade iha Hera, ohin.
Xefe Governu relata, povu Timor-Leste liu ona husi períodu naruk husi sofrimentu no konflitu, maibé ho fiar iha Maromak no domin bá rai ida-ne’e, konsege harii nasaun ida-ne’ebé livre no soberanu.
“Nasaun ida-ne’ebé hakarak dezenvolve tenke iha líder sira-ne’ebé iha kompeténsia, integridade no valór morál ne’ebé metin,” PM Xanana afirma.
Tanba ne’e, líder nasionál ne’e dehan dezenvolvimentu nasaun nian la haree de’it ba kresimentu ekonomia no infraestrutura, maibé tenke fó atensaun ba dezenvolvimentu ema liuhusi edukasaun, espiritualidade, étika no formasaun umana.
Iha oportunidade ne’e, nia mós hato’o apresiasaun ba Kompañia de Jesus tanba nia kontribuisaun naruk iha Timor-Leste liuhusi edukasaun, akompañamentu espirituál, servisu sosiál no formasaun ba juventude.
“Ha’u fiar katak Sentru Espiritualidade Inaciana bá Dame no Rekonsiliasaun sei sai patrimóniu ida ba povu Timor-Leste, nakloke ba ema hotu hodi promove enkontru, diálogu, rekonsiliasaun no esperansa liuliu ba jerasaun foun sira,” nai dehan.
Iha fatin hanesan, Arsebispu Aekidioseze Metropolitana Dili, Dom Virgílio Kardeál do Carmo da Silva, hateten sentru ida-ne’e la’ós de’it edifísiu maibé fatin atu hasoru Maromak, hametin fiar no forma ema sira atu sai instrumentu dame.
“Sentru ida-ne’e sei sai fatin ida-ne’ebé ema bele halo ninia nia laran hakmatek, rona Maromak nia lian no aprende atu hadomi no servisu ba ema seluk,” Dom Virgílio Kardeál hateten.
Espiritualidade Inaciana ne’ebé mai husi Santo Inácio de Loyola hanorin ema atu halo disernimentu espirituál no buka Maromak iha buat hotu, atu desizaun sira lori esperansa, justisa no dame ba família, komunidade no nasaun.
Superiór Jesuíta iha Timor-Leste, Padre Erik John, mós hateten sentru ne’e sei sai “uma” ba orasaun, silénsiu, disernimentu, formasaun no kompromisu atu promove dame no rekonsiliasaun.
“Timor-Leste presiza ema sira-ne’ebé bele halo diálogu, hatene rona malu no servisu ba bem komún, tanba dame tenke harii loro-loron liuhusi domin, perdaun, solidariedade no servisu ba ema seluk,” nia dehan.
Sentru Espiritualidade Inaciana bá Dame no Rekonsiliasaun ne’ebé harii iha Hera, Munisípiu Dili, hetan apoiu husi doadór sarani fiar-na’in sira mai husi Singapura, ne’ebé ho laran luak kontribui ba konstrusaun sentru ida-ne’e.
“Sentru ne’e sei sai fatin atu promove espiritualidade, dame, rekonsiliasaun no hametin relasaun entre ema sira liuhusi valór Inacianos kona-ba servisu, solidariedade no respeitu ba ema hotu,” nia hateten.
Enkuantu serimónia inaugurasaun marka ho prezensa husi entidade oioin hanesan autoridade Estadu, líder Igreja Katólika, Kompañia de Jesus, relijiozu no relijioza sira, benfeitór sira, doadór sira husi Singapura no konvidadu sira seluk.
Jornalista : Alexandra da Costa
Editór : Cancio Ximenes
