Presu billete Berlin Ramelau no Nakroma la balansu ho despeza ba ró
DILI, 07 Agostu 2026 (TATOLI)—Administrasaun Portu Timor-Leste (APORTIL) liuhusi Vogál II ba Asuntu Administrasaun no Finansas, Leandro Sena, hateten presu billete ró nian la balansu ho despeza ba Ró Berlin Ramelau no Berlin Nakroma.
Notísia Relevante: APORTIL halo teste operasaun Ró Berlin Ramelau atraka iha portu Ataúru
“Ami hanoin hela atu aumenta presu billete ró nian, maibé ne’e kestaun polítika tanba ró Estadu (Patrimóniu Estadu) entaun APORTIL halo de’it jestaun ba operasaun ró nian,” Vogál II APORTIL ne’e informa ba Agência Tatoli iha nia kna’ar fatin Kuarantena Tasi-Tolu, ohin.
Asaun ne’e, nia dehan, tenke iha desizaun polítika ida husi nivel altu hanesan Konsellu Ministru no Ministériu Finansa. Ho nune’e sira labele hasa’e presu billete tuir sira-nia hakarak, aleinde ró rua ne’e sosa mós tanba atu afsilita povu Oekusi no Ataúru.
“Karik iha ona mudansa atividade ekonomia iha Timor-Leste la’o di’ak, obrigatoriamente ita tenke aumenta presu billete ró nian hodi hakmaan despezas ba ró nian,” nia dehan.
Tanba uluk operasaun ró ba Ataúru iha de’it loron Sabádu maibé agora sira aumenta oráriu viajen ba Ró Nakroma no Ró Succes hodi diversifika mós atividade ekonomia iha Ataúru.
“Hanesan imi haree agora komunidade Ataúru hahú aumenta sira-nia atividade negósiu iha Portu Ataúru tanba turista estranjeiru no lokál barak mak ba vizita, entaun atividade sira-ne’e presiza kria tan nune’e operasaun ró mós labele paradu,” nia informa.
Ho nune’e, tuir nia, bele aumenta tan setór turizmu (akomodasaun ospitalidade) no komérsiu (negosiante) tanba pasajeiru barak mak hakarak ba vizita Ataúru.
Aleinde fila kedas, sira mós hakarak deskansa tiha loron ida ka rua, entaun ida-ne’e bele ajuda diversifika ekonomia rai-laran liuhusi servisu integradu.
Enkuantu daudaun ne’e presu billete ró Berlin Ramelau no Berlin Nakroma ba Oekusi ho presu $8, Berlin Nakroma ba Ataúro ho presu $4,ró ró privadu Succes ba Oekusi ho presu $10 no ba Ataúru presu $5.
Jornalista : Alexandra da Costa
Editór : Cancio Ximenes
