APORTIL halo teste operasaun Ró Berlin Ramelau atraka iha portu Ataúru
DILI, 03 Agostu 2026 (TATOLI)-Administrasaun Portu Timor-Leste (APORTIL, sigla portugés) halo viajen teste operadaun ba kapasidade no seguransa Ró Berlin Ramelau atu atraka iha portu Ataúru, hodi substitui bainhira Ró Nakroma avária ka halo manutensaun.
Prezidente Konsellu Administrasaun Portu Timor-Leste, José de Oliveira Leong, hateten ohin loron APORTIL hamutuk no parséria sira halo viajen Dili mai Ataúru ne’e atu koko (teste) halo operasaun Ró Berlin Ramelau atraka iha portu Ataúro, tanba kondisaun portu ne’e rasik ladun sufisiente atu ró ho kapasidade boot atu atraka.
“Ohin, ami konvida entidade hotu-hotu atu mai observa rasik, tanba dezenvolvimentu iha Ataúru ita presiza ró ne’ebé ho kapasidade boot atu bele akumula pasajeiru no materiál konstrusaun sira liuliu alkatraun,” Prezidente APORTIL ne’e hateten ba jornalista sira iha Beloi Ataúru, ohin.
Nia dehan, ho prezensa husi membru Parlamentu Nasionál liuliu komisaun E ne’ebé trata asuntu infraestrutura no Komisaun Anti Korrupsaun, atu bele haree hodi ajuda responde ba situasaun Portu Ataúru nian.
“Tanba ami APORTIL ko’alia de’it asuntu tékniku no hanesan preparasaun dezeñu portu Ataúru, enkuantu kona-ba atu halo adisionál orsamentu ba reabilitasaun ne’e kompeténsia Ministériu nian,” nia esplika.
Nia hatutan ho teste ohin hatudu rezultadu katak posibilidade ró Berlin Ramelau bele atraka bainhira anin la boot no tasi la maran, enkuantu tasi maran entaun difikulta tebes ró atu atraka ho di’ak tanba ne’e presiza duni reabilita portu Ataúru.
“Tanba ita presiza ró ne’ebé bele substitui ró Berlin Nakroma bainhira halo manutensaun,” nia hateten.
Iha fatin hanesan, reprezentante Deputada husi Komisaun E ba asuntu infraestrutura, Irene Gonzaga, hateten ohin prosesu operasaun Ró Berlin Ramelau husi Dili mai ne’e la’o ho di’ak tanba ho kapasidade boot bele akumula pasajeiru to’o 300-resin, maibé ohin ró ne’e atu atraka susar tebes.
“Nune’e hanesan ami komisaun E, ami haree direta no diskute ona ami sei rekomenda ba iha Governu hodi hadi’a espasu luan liután ita-nia portu Ataúru, atu labele fó impaktu ba kondisaun ró nian,” nia dehan.
Nune’e mós, Komisáriu Komisaun Antí Korrupsaun, Rui Pereira dos Santos, reforsa tan katak kondisaun ró di’ak hela problema ne’e mak fatin atu atraka ne’e, entaun sira iha kompeténsia atu halo monitorizasaun no inspesaun ba projetu maibé ohin mai iha ne’e atu haree ba kondisaun Portu Ataúro nian.
“Ohin, ró atu atraka ne’e araska loos no tasi moos la kle’an, aleinde ninia sinál tráfiku marítima atu fasil iha ró hodi tama mós laiha,” nia dehan.
Tanba ne’e mak nia dehan katak KAK sei kria kondisaun di’ak ba povu Ataúru atu halo movimentu, entaun orsamentu ba portu ida-ne’e tenke halo, karik portu ne’e reabilita husi parte KAK sei mai halo monitorizasaun no inspesaun atu orsamentu labele nabeen (gastu arbiru).
Kapasidade Ró Berlin Ramelau bele akumula pasajeiru 380, bele tula kareta 15 to’o 840 tonelada karga, enkuantu Ró Berlin Nakroma bele tula pasajeiru to’o 300 no 110 tonelada karga.
Ró Berlin Ramelau nia naruk metru 67,3 nia luan metru 16, nia klean ba tasi metru 3,3 no nia aas metru 4,8.
Enkuantu Ró Berlin Nakroma nia naruk metru 47,25, nia luan metru 12, nia kle’an ba tasi metru 2,42 no nia aas metru 3,6.
Jornalista : Alexandra da Costa
Editór : Cancio Ximenes
