Setór agrikultura hetan de’it 1,5% husi totál kréditu millaun $768
DILI, 10 Setembru 2026 (TATOLI) – Setór agríkola Timor-Leste nian hetan de’it porsentu 1,5 husi totál kréditu ne’ebé dezembolsa husi sistema bankáriu to’o Juñu 2026. Enkuantu, maioria kréditu kontinua konsentra iha indivíduu, komérsiu no finansa, no konstrusaun.
Diretór-Ezekutivu Ekonomia no Polítika Monetária Banku Sentrál Timor-Leste (BCTL, sigla portugés), Gastão de Sousa, informa dadus BCTL nian iha Revizaun Ekonómiku Médiu Prazu Timor-Leste 2026 hatudu katak totál kréditu atinje tokon $768 iha Juñu 2026, ho proporsaun kréditu ba Produtu Internu Brutu (PIB) porsentu 39,7 no taxa funan empréstimu besik porsentu 10,3.
Nia dehan katak husi totál kréditu ne’e, indivíduu sira simu parte boot liu, ho pursentu 43,9, ka maizumenus millaun $336,8. Setór komérsiu no finansa ho porsentu 26,9, ka millaun $206,4, enkuantu setór konstrusaun hetan porsentu 20,7, ka millaun $159,1.
Nia esplika katak setór produtivu sira hetan parsela kréditu ne’ebé relativamente ki’ik. Setór Agrikultura hetan de’it besik millaun $11,5, (1,5%), manufatura millaun $6,7, (0,9%), transporte millaun $17,9 ka 2,3%, no turizmu no servisu millaun $29,1 ka 3,8%.
“Ita nota katak totál empréstimu sira hatudu kreximentu ne’ebé konsistente husi 2022 to’o 2026. Maski nune’e, setór finanseiru karateriza nafatin ho likidez ne’ebé barak, enkuantu intermediasaun finanseira limitadu nafatin”, Gastão dehan.
Iha Juñu 2026, ativu sira sistema bankáriu nian aumenta ho pursentu 19,5 kada tinan. Maibé, pursentu 60 husi aumentu ne’e mai husi kolokasaun ho banku sira seluk, enkuantu empréstimu sira reprezenta de’it pursentu 23.
Tuir BCTL, kompozisaun ne’e indika katak dezafiu prinsipál mak aumenta kapasidade sistema bankáriu nian atu transforma likidez ne’ebé disponivel sai kréditu ba ekonomia doméstika, duké problema disponibilidade likidez rasik.
Jeralmente, iha Juñu 2026, sistema finanseiru Timor-Leste rejista totál depózitu hamutuk millaun $1,911, ativu millaun $3,046, no ativu estranjeiru hamutuk millaun $1,701.
BCTL konsidera katak hametin infraestrutura finanseira no habelar asesu ba finansiamentu krusiál atu apoia investimentu privadu no aprofunda intermediasaun finanseira iha Timor-Leste.
Notísia relevante: Valór importasaun atinje millaun $580, Indonézia no Taiwan sai fornesedór prinsipál
Jornalista: Arminda Fonseca
Editora: Maria Auxiliadora
