Kopa Juvenil Sub-17 2026 hahú ho espirítu foun ba futuru futeból TL
DILI, 21 Agostu 2026 (TATOLI)—Asosiasaun Futeból Dili Oeste (AFDO) hala’o serimónia abertura ba jogu Kopa Juvenil époka 2026 sub-17 iha kampu futeból Fatuhada, Dili.
Prezidente Asosiasaun Futeból Dili Oeste, Luis Evaristo do Santos, hateten kopa juveníl Sub-17 atu hahú espirítu foun ba futuru Futeból Timor-Leste.
“Kopa juvenil sub-17 ne’e atu hasae espiritu foun ba futuru tanba ne’e partiispa husi grupu hamutuk 16 inklui mós joven sira husi suku no eskola balun iha iha oeste nian,” Luis Evaristo do Santos hateten banhira partisipa abertura kopa juveníl sub-17 2026 iha kampu futebóll F-FDTL Fatuhada, ohin.
Nia esplika, Jogu ne’e hala’o durante fulan ida hahú 21 Agostu to’o 17 Setembru no klubu hotu-hotu sei hasoru malu, depois fahe ba grupu haat no sé mak sai kampiaun grupu mak fahe ba faze uitavu no meia finál sei hahú iha 17 Setembru 2026.
“Suku sira mai iha oeste nian, iha Postu Administrativu Dom Aleixo no Vera Krúz no orsamentu ba realizasaun kopa juvenil sub-17 ne’e hanesan mós asosisaun sira seluk iha munisípiu. Tanba ne’e, ita presiza atu jere no dezenvolve ita-nia kbiit tuir osan ne’ebé mak fó no ita mós fó tempu atu buka tan doadór balun atu apoiu hodi realiza kopa juvenil sub-17 ne’e,” nia dehan.
Nia relata, montante ba orsamentu ne’e hamutuk millaun $2 maibé hetan apoiu balun husi nia parseiru sira liuliu asosisaun futeból nian.
Iha fatin hanesan, Sekretáriu Jeral F-FTL, Fernando Baptista, hateten transformasaun futeból sai orgullu nasionál no ida-ne’e hola parte iha programa federasaun futeból TL nian, atu bele reprezenta no reflete lema katak kompetisaun atividade futeból la’ós de’it halo iha Dili.
Maibé, nia hateten, tenke halo iha asosiasaun munisípiu sira hotu hodi hetan oportunidade hanesan hodi bele espresa sira-nia talentu no abilidade.
“Ohin ita halo iha Dili oeste nian, maibé ita-boot sira hatene katak asosiasaun hotu-hotu ne’ebé mak iha TL hanesan mós kompetisaun sira-ne’ebé mak agora daudaun iha,” nia dehan.
Nia haktuir, atividade la’ós ida primeiravés maibé foin eleitu iha tinan kotuk, programa ne’e la’o ona no hakarak afirma katak nafatin ho kompromisu hodi organiza no realiza formasaun sira ba juvenil no juniór sira tanba atu dehan katak ne’e la’ós ba sub-17, maibé ba sub 15 la’ós ba mane maibé ba mós feto. Ida-ne’e mak komprimisiu ne’ebé mak husi federasaun futeból garante mantein atu la’o.
“Ita realiza jogu ne’e ita-nia objetivu klaru kedas banhira prezidente eleitu dahuluk iha 2025, ita halo jogu ida-ne’e halo kedas ho selesaun. Tanba, ita iha faze jogu entre munisípiu interna kada asosiasaun halo ninian, depois kampiaun sei ba joga iha rejionál no mai iha nasionál. Nune’e treinadór sira hahú haree ona no sira-ne’ebé mak iha talentu no abilidade di’ak treinadór selesaun sub-17 hili lubuk ida hodi reprezenta selesaun nasionál,” nia dehan.
Entretantu, husi abertura kopa juvenil sub-17 2026 ne’e partisipa husi Reprezentante Prezidente Autoridade Munisípi Dili, Prezdente Asosiasaun Futebol Dili Oeste no entidade seira seluk inklui treinador no arbitu sira.
Jornalista : Felicidade Ximenes
Editór : Cancio Ximenes
