Projetu “Peace Mural” halibur universitáriu promove dame liuhusi pintura iha morru
DILI, 12 Setembru 2026 (TATOLI)—Juventude husi Universidade oioin iha Dili, halibur malu iha Projetu “Peace Mural” hodi promove mensajen dame liuhusi pintura iha morru sira iha Universidade nian.
“Ami-nia objetivu mak atu harii dame ba malu entre Universidade ida ho universidade seluk. Aleinde ne’e, ami mós motiva ba malu oinsá fó respeitu ba universidade sira seluk no kria respeitu entre relijiaun,” Estudante Fakuldade Siénsia Sosiál no Umanidade, Universidade da Paz, Elisio Espirito Santo da Costa Ximenes, hateten ba jornalista sira, iha kampus UNPAZ, Sábadu ne’e.
Tuir nia, projetu ne’e nia aprende buat foun barak liuliu kona-ba dame no matéria oioin seluk tan.
“Se de’it mak iha interese bele envolve, tanba pás la’ós de’it ba juventude maibé ba dosente no katuas ferik sira,” nia hatutan.
Daudaun ne’e, atividade konsentra iha Universidade da Paz (UNPAZ), tanba sai hanesan uma-na’in, pastisipa mós estudante sira husi UNiversidade Nacional Timor Lorosa’e (UNTL), Universidade Dili (UNDIL) no uiversidade sira seluk.
Iha Projetu Peace Mural ne’e, nia dehan, sira pinta imajen barak ne’ebé reflete ba misaun kada universidade liuliu prosesu dame nian. Ne’ebé iha ligasaun mós ho kultura, tanba kuandu ko’alia kona-ba dame la’ós de’it iha eskola, maibé mós iha kultura tanba Timor iha diferensa kultura barak.
Ba futuru, nia dehan, sira iha planu atu lori atividade ne’e ba universidade sira seluk nomós ba munisípiu sira. Maibé estudante voluntáriu sira-ne’e hakarak servisu hamutuk ho Ministériu Juventude, Desportu, Arte no Kultura (MJDAK) hodi mellora liután atividade pintura.
Kona-ba dezafiu, nia dehan, maske iha dezafiu kiik hanesan falta komunikasaun maibé ne’e hanesan prosesu aprendizajen ba sira tanba liuhusi dezafiu mak bele sai ema ne’ebé kriativu no maduru.
Nia subliña katak UNPAZ hanesan ‘Universidade da Paz’ nune’e nia komunidade akadémika tenke sai ezemplu ba promosaun dame.
Nune’e mós, Imelda Alves, nu’udar estudante Fakuldade Enjeñaria hateten projetu ne’e kria dame entre estudante hosi kada universidade sira.
“Projetu Peace Mural ne’e kria atividade voluntáriu ida ba estudante sira entre universidade sira iha Dili atu promove no espresa ita-nia ideia sira liuhosi pintura,” nia dehan.
Atividade pintura ne’e hahú iha tuku 09h30 dadeer to’o 15h00 lorokraik, maibé atividade ne’e estra ba estudante sira, karik iha aula entaun la tuir maibé haree aula free mak bele partisipa iha atividade pintura.
Entretantu, Estudante hosi Universidade Nasionál Timor Lorosa’e (UNTL) husi Fakuldade Turizmu Departamentu Jestaun, Arte no Kultura, Sheva Kalyça Judixe Maia Pereira, hateten peace katak entre ema na’in-rua (2) iha armonia, ne’ebé liuhusi pintura ne’e bele kria dame entre estudante iha universidade sira.
“Tanba ne’e, ha’u envolve iha projetu peace mural ne’e hanesan esperiénsia foun ida mai ha’u tanba ha’u rasik mós gosta pinta. Entaun, liuhusi projetu ida-ne’e aumenta koñesimentu ka abilidade oinsá pinta dezeñu ida di’ak. Aleinde ne’e bele koñese tan kolega foun iha ambiente foun ida-ne’e hodi aprende hamutuk kona-ba saida mak páa liuhusi pintura ida-ne’e,” nia esplika.
Maibé, nia dehan, ba oin mak bainhira ramata iha interese hakarak kontinua dezenvolve pintura hamutuk ho arte moris no kolega seluk ne’ebé iha abilidade pinta.
“Ba futuru, ha’u hakarak join ho arte moris tanba sira ija esperiénsia di’ak kona-ba arte nian. Ha’u pesoál gosta pinta no ha’u estudante UNTL ne’ebé foti Fakuldade Turizmu, Departamentu Jestaun Arte no Kultura. Ida-ne’e iha relasaun ho ha’u nia estudu no sei aplika no mellora liután liuhusi ha’u-nia pintura,” Sheva dehan.
Kona-ba materiál pinta ne’e menus tebes tanba ne’e parte relevante presiza aumenta kuantidade pinta hodi bele fó forsa ba pintura ida.
“Ami presiza tinta barak hodi detallu liu iha pintura ida. Tanba daudaun ne’e itaiha tinta kór oin 10-resin de’it. Sujere aumenta tinta, inklui brush,” nia dehan.
Jornalista : Osória Marques
Editór : Cancio Ximenes
