Komisaun Rekrutamentu konklui reverifikasaun dokumentu kandidatu membru PNTL foun

DILI, 11 Setembru 2026 (TATOLI)—Komisaun rekrutamentu konklui ona reverifikasaun dokumentu kandidatu membru foun Polísia Nasionál Timor-Leste (PNTL) hamutuk 12.874.

Desizaun ne’e bazeia ba Diploma Ministeriál 35/2026 no despaisu Ministru Interiór kona-ba estabelesimentu Komisaun Rekrutamentu foun no despaisu númeru 31/2026 Ministru nian kona-ba kompozisaun juri ba reverifikasaun membru PNTL foun.

Depoizde Komisaun hetan despaisu husi Ministru kona-ba estabelese Sekretariadu ho juri iha loron 26 Jullu, Prezidente Komisaun Rekrutamentu, Komisáriu Asistente Polísia José Soares iha loron ne’e konvida kedan juri hodi halo enkontru no esplika ba Sekretariadu katak ida-ne’e mak Rezolusaun Governu hodi kbiit ba komisaun atu serbisu.

Tuir Prezidente Komisaun Rekrutamentu, hateten, Ministru nia despaisu atubele halo reverifikasaun ba dokumentu.

“Tuir fali ita halo pedidu ba Sekretariadu anteriór para ita bele asesu ba dokumentu fíziku no elektróniku. Sira entrega xave iha loron 11 Agostu no ita asesu dokumentu sira ne’e husi dokumentu fíziku no eletróniku sira no ita halo reverifikasaun dokumentu husi loron 13 to’o 22 Agostu 2026,” Komisáriu Asistente Polísia José Soares hateten ba Jornalista sira iha Sentru Formasaun, Sesta ne’e.

Komisaun agora termina ona prosesu reverifikasaun dokumentu no aprezenta ona rezultadu ba komandante Jerál no envia ba Ministru Interiór hodi deside bainhira atu publika.

“Kandidatu hotu-hotu Maubere oan no Buibere oan ain tanan ne’ebé mak moris iha rai ida-ne’e, nia iha direitu atu teste ida-ne’e mak ita halo,” nia akresenta.

Notísia relevante : Komandu PNTL prefere kouta pursentu 20 iha vaga rekrutamentu PNTL

Komisáriu dehan, rekrutamentu ne’e atu promove transparánsia, akontabilidade no asegura kredibilidade.

Sekretariudu no Juri timoroan sira halo ona termu juramentun ida molok sira halo serbisu nu’udar Prezidente Komisaun Rekrutamentu.

“Sira asina katak sira jura ba rai ida-ne’e, ba eroi sira, ba matebian sira, Konstituisaun no Lei sira iha Timor atu obdese ba reverifikasaun dokumentu ne’e, atu asegura konfisialidade no la haree ba familiarizmu atu Polísia nia oan timoroan hotu ne’ebé priense rekezitu tuir diploma ne’e, ne’e mak bele liu. Agora ita hein de’it Ministru mai ita entrega ba atu públika,” nia katak.

Bainhira Ministru Interiór asina ona mak bele publika kandidatu sira-nia naran ne’ebé pasa verifikasaun.

Enkuantu uluk ne’e publikasaun naran ba hirak ne’ebé admitidu iha selesaun dokumentu loron-10, kuandu ba hirak ne’ebé la liu faze ne’e bele halo reklamasaun, maibé bainhira aplika sistema eleminativu labele. Komisaun mak sei tau hotu razaun kona-ba kandidatu ida la liu.

Kona-ba teste no prova kulturál sei halo ho sistema iha funsaun públika, nune’e fó oportunidade ba ema hotu atu tuir teste bazeia ba nia méritu no kapasidade.

Tuir fali teste psikolojia uluk ezame ona, juri rekomenda atu konsidera rezultadu ne’ebé iha GNR nia liman, la liu husi PNTL nian liman rezultadu ne’ebé mak orijinál. Komisaun sei mantein ho ida-ne’e.

Prezidente Komisaun Rekrutamentu dehan, reverifikasaun dadus kandidatu membru PNTL foun hamutuk 12-resin, ne’ebé tuir loloos halo iha Komisaun Funsaun Públika bainhira koordena ho sira kuandu liuhusi ne’ebá sei han tempu semana rua ou semana rua-resin.

Maske nune’e, reverifikasaun dokumentu ba kandidatu membru foun PNTL halo iha Sentru Formasaun Polísia ho sistema instaladu.

“Kandidatu sira ne’ebé la priense idade ka nível eskolaridade, entaun ida-ne’e mak ita haree, ita atualiza no ita uza ida-ne’e no ita hatama ba iha sistema dijitál, kuandu ema ida ita halo tiha verifikasaun kuandu ida ba muda fali sistema ne’e mak deteta ne’e auto kontrolu ne’ebé mak di’ak no garante nia transparánsia no evita erru umanu ne’ebé mak iha,” nia tenik.

Komisaun identifika iha dokumentu falsu balun iha prosesu reverifikasaun ba baze dadus kandidatu membru PNTL.

“Ita identifika mas rezulta ha’u seidauk públika, iha tempu badak kuandu Ministru publika ita sei públika, no kuandu ita publika ona ema idaidak sei hatene ha’u la pasa tanba saida. Ami identifika balun iha númeru no depois ita publika sira sei hatene balun naran la hanesan diploma eskola nia la hanesan ho RDTL,” nia informa.

Komisáriu José hateten, Komisaun Rekrutamentu deteta iha kandidatu nia dokumentu hetan fali iha gabinete inklui buat sira seluk.

“Ami nia papel ami atu halo reverifikasaun de’it ba dokumentu tanba ida ne’e kontinuasaun husi servisu ne’ebé mak uluk sira halo”, nia dehan.

Lista ba reverifikasaun dokumentu kandidatu membru PNTL kompleta ho razaun admitidu no la admitudu nune’e fó garante akontabilidade no evita falsifikasaun.

Matéria ne’ebé mak atu ezame tuir mai mak língua tetum, portugés, istória, geografia matimátika no Konstituisaun.

“Ha’u garante tanba ne’e sistema mak halo, ita uza sistema ita la uza manuál para ema rua inventa sasán. Laiha iregularidade iha reverifikasaun baze dadus no ha’u garante ida-ne’e,” nia hato’o.

Bazeia ba rezolusaun númeru 15/2026 entrevista laiha, halai laiha, iha mak prova kulturál, psokolojia, no médiku.

“Ha’u garante iha Novembru sira ne’e kandidatu membru PNTL tama ona iha Sentru Formasaun. Teste kulturál sei la halo loron-ida maibé teste sei tuir abjad, teste ne’e sei halo iha Komisaun Funsaun Públika tama tuir Munisípiu ida hotu tuir ida kedas,” nia katak.

Komisáriu José Soares hatutan, teste kulturál sei halo iha loron 11, konta mós Sábadu no Domingu tanba Governu hakarak prosesu ne’e lalais.

Jornalista     : Natalino Costa

Editora          : Julia Chatarina