MI autoriza ona Komandu PNTL públika lista rezultadu reteste kandidatu membru foun

DILI, 15 Setembru 2026 (TATOLI)–Ministru Interiór autoriza ona Komandu Polísia Nasionál Timor-Leste (PNTL) liuhusi Komisaun Rekrutamentu atu públika lista naran kandidatu ne’ebé admitu iha faze reverifikasaun dokumentu.
“Instrusaun husi Ministériu Interiór katak tenke públika ona, kumpre ba orientasaun ida-ne’e, hahú husi aban ita sei entrega rezultadu reverifikasaun dokumentu ba Jornál Repúblika ba kandidatu ho totál 12.877,” Prezidente Komisaun ba Rekrutamentu kandidatu membru PNTL foun tinan 2026, Komisáriu Asistente Polísia José Soares, informa ba jornalista sira liuhusi konferénsia imprensa ne’ebé halo iha Kuartél Jerál PNTL, Kaikoli, Tersa ne’e.
Nia haktuir, númeru kandidatu ne’ebé mak komisaun uluk públika iha 12.874, maibé bainhira publika dadus aumenta oituan.
“Dokumentu tolu ita hetan iha gaventa Sekretáriadu ne’ebé mak sira serbisu. Iha númeru anteriór 12.874 maibé númeru aumenta tanba dokumentu balun hetan iha armáriu laran, balun iha gaveta, tanba ne’e mak sai tiha 12.877,” nia akresenta.
Notísia relevante : Komisaun Rekrutamentu konklui reverifikasaun dokumentu kandidatu membru PNTL foun
Komisaun sei admite kandidatu ne’ebé mak priense kritériu atu hakat ba faze prova kulturál, maibé ida-ne’ebé mak la prienxe kritériu sei fó sai hotu iha lista.
“Balun sira ne’ebé prienxe, balun ne’ebé mak la prienxe, tanba ita tenke promove buat ida méritu, tenke transparánsia halo buat ida tenke ho kompromisu, katak ha’u halo loos,” nia tenik.
Komisaun hahú ohin halo impresaun ba rezultadu lista reverifikasaun dokumentu kandidatu membru PNTL foun, nune’e iha Kuarta (16/09) sei públika iha jornál no semana ne’e nia laran Komandu PNTL liuhusi Komisaun Rekrutamentu sei publika iha Komandu Munisípiu sira no Sentru Formasaun Polísia atu kandidatu sira bele haree sira-nia naran.
Aleinde ne’e, Komisaun sei fó loron-lima ba kandidatu sira atu verifika naran hafoin ne’e maka hakat ba prova kulturál.
“Rezultadu ne’ebé mak Sekretariadu halo ita kaer metin ba prinsípiu ne’ebé mak hakerek iha diploma minsiteriál númeru 35/2026, ko’alia kona-ba méritu, transparánsia, akontabilidade no kredibilidade,” nia tenik.
Komisáriu Asistente dehan, Sekretariadu no juri halo kompromisu atu serbisu tuir lei ne’ebé vigora.
“Ministeriu Interiór, Komandu Jerál no parte ne’ebé de’it la halo intervensaun ba ami-nia serbisu, no ami sente katak ami-nia serbisu halo tuir lei no independente,” nia katak.
Juri sira kompostu husi internasionál iha Guarda Nacional Republicano (GNR) na’in-rua, TLPDP na’in-rua, PNTL na’in-rua inklui Komisaun Funsaun Públika.
“Aproveita aban ba ohin, ba povu tomak ne’ebé mai husi Maubere oan, Buibere oan, Ain-tanan sé de’it nia oan, Timor oan priexe rekezitu atu hakarak tuir prova kulturál. Ami sei fó loron-lima, fó sai iha Jornál Repúblika, ami sei fó sai iha munisípiu sira no iha Sentru Formasaun atu fó biban ba kandidatu sira atu ba haree sira-nia naran no karik iha buat ruma la loos tenke reklama,” nia fó sai.
Durante reverifikasaun dokumentu, nota katak iha dokumentu 1.000-resin la kompletu, iha 100-resin mak idade liu ona 24, balun Pré-Sekundáriu, balun la’ós sidadaun Timor oan.
“Ida ne’e mak ita públika. Ha’u husu ba PDHJ atu akompaña enkontru, NGO, autoridade sira seluk atu serbisu hamutuk haree ami-nia serbisu tuir lei ka lae nune’e atubele asegura funsionamentu Sekretáriu ida-ne’e la’o ho di’ak. Ha’u kompromete ba povu Timor laran tomak, se ha’u sala hanesan Komisaun ida uluk, ha’u entrega ha’u-nia pistola ba
Iha biban ne’e, José Soares hateten, prova kulturál ba kandidatu sira ne’e sei tuir alfabetu A mak uluk no teste ne’e sei halo bazeia ba sistema elektrónika
“Atu garante rezultadu ne’ebé mak loos, laiha intervensaun umanu, sei laiha erru umanu. Ne’ebé sira ezame hotu iha ne’ebá minutu 20 ka minutu 30 sira sai mai, sira haree tiha ona rezultadu. Laiha envolvimentu husi Komisaun Funsaun públika atu fó valór ba sira ou Sekretariudu ida-ne’e mak ita hakarak promove,” nia hatutan.
Komisaun sei fó tempu ba kandidatu sira iha loron-lima nia laran atu halo reklamasaun, kuandu la satisfaz ho buat balun.
“Iha loron-lima ne’e sira ne’ebé mak hakarak hato’o sira-nia rekursu tanba iha preokupasaun ruma ne’e dalan nakloke ba sira,” Prezidente Komisaun fó hanoin.
Jornalista : Natalino Costa
Editora : Julia Chatarina

