CNE Baukau realiza edukasaun sívika ba votante foun iha Laga

BAUKAU, 15 Setembru 2026 (TATOLI) —Komisaun Nasionál Eleisaun (CNE-sigla portugeza) Munisípiu Baukau realiza atividade edukasaun sívika ba votante foun iha Eskola Sekundária Jerál Tekinomata, Postu Administrativu Laga, Munisípiu Baukau, Tersa ne’e.

Diretór CNE .unisípiu Baukau, Esmeraldo Damião Belo, esplika atividade referida nu’udár programa trimestrál datoluk iha-ne’ebé realiza ho objetivu disemina kona-ba preparasaun eleisaun tolu ne’ebé tuir planu sei hala’o iha tinan-2027.

“Objetivu loloos mak kontinua promove ita-nia eleitór foun sira liuliu estudante atu prepara ba eleisaun sira-ne’ebé tuirmai,” Esmeraldo Damião hateten iha ninia kna’ar fatin, Vila Nova, Baukau.

Nia relata CNE kontinua hanorin votasaun sira liuliu prepara an ba realizasaun eleisaun tolu hanesan eleisaun prezidensiál no munisipál ne’ebé tuir planu hala’o iha tinan 2027 no eleisaun parlamentár ne’ebé sei realiza iha tinan 2028.

Partisipante sira iha atividade referida hamutuk na’in-92 iha-ne’ebé ho esperansa bele partisipa másima iha festa demokrasia tanba konsideradu votante mak na’in ba eleisaun sira iha Timor-Leste.

“Tenke partisipa másima tanba estudante sira-ne’e mak nu’udár matan, tilun no ibun hodi hatutan matéria ba inan-aman sira,” Esmeraldo Belo akresenta.

Entretantu, atividade edukasaun sívika husi CNE hala’o ona iha Postu Administrativu Baukau Vila, Suku Lelalai (Kelikai) no Maluru (Postu Matebian), Suku Uatulari (Postu Vemasse), Atelari (Postu Laga) no Lavateri (Postu Baguia) no tuir planu sei kontinua tan iha Postu Venilale, Kelikai Antigu, Vemasse no Baguia iha trimestrál ikus tinan-ne’e.

Jornalista: Natalino Belo 

Editór: Xisto Freitas da Piedade