PNDS 2026 fasilita movimentu komunidade Dom Bosco ne’ebé enfrenta problema estrada tinan 20-resin
BOBONARU, 15 Setembru 2026 (TATOLI)-Programa Dezenvolvimentu Nasionál Suku (PNDS) Regulár 2026 konstrui estrada rurál iha suku Holsa, postu administrativu Maliana, ne’ebé liga husi área Dom Bosco bá aldeia Taz hodi fasilita movimentu komunidade ne’ebé durante tinan 20-resin hasoru difikuldade ba transporte, liuliu iha tempu udan.
Xefe Suku Holsa, António Santa Cruz, hatete katak implementasaun projetu PNDS ne’e remata ona, maibé obra seidauk kobre hotu tanba limitasaun orsamentu.
Nia esplika katak estrada ne’e importante tebes tanba benefisia ba komunidade aldeia tolu kompostu husi aldeia Taz, Loloa no Bilicou sorin, tanba ante konstrusaun, movimentu ema no veíkulu hasoru difikuldade boot, liuliu iha tempu udan.
“Implementasaun PNDS Regulár konstrusaun estrada iha suku Holsa remata ona. Ita hakarak kontinua tan to’o leten, maibé depende ba orsamentu. Tinan rua ona orsamentu ki’ik. Se osan hanesan tinan kotuk liubá karik ita bele kontinua konstrusaun to’o leten ne’ebá”, Xefe Suku Holsa António Santa Cruz hatete ba Tatoli, ohin.
Enkuantu, rezidente iha área Dom Bosco, Anita dos Santos, hatete katak sira sente kontente tanba PNDS 2026 bele responde ba problema estrada ne’ebé sira enfrenta durante tinan 20resin.
Notísia relevante: PAM Bobonaru husu ezekuta obra PNDS 2026 ho kualidade
“Ami kontente tebetebes tanba tinan 20-resin ona am- nia área ida ne’e terus ba tahou iha tempu udan. Iha tempu bailoro hanesan la’o iha mota-laran. Dalaruma ami bele hola motór mós labele para iha uma, tenke para de’it iha uma sira iha kraik,tanba estarada ne’e tahu dodok loos”, Anita dos Santos relata.
Nia konsidera obra ne’e bele hakonu sira povu nia esperansa ba ukun rasik-an tanba bairru Dom Bosco mós iha períodu rezisténsia sai baze ba organizasaun rezisténsia sira halo klandestina hodi kontribui luta ba libertasaun pátria.
“Agora ami povu kontente tanba tinan ida-ne’e rezolve ona ami-nia problema liuhusi PNDS. Maski obra ne’e la kobre to’o leten, maibé bele fasilita movimentu ami-nian, liuliu iha tempu udan”, nia realsa.
Komunidade espera katak konstrusaun estrada ne’e bele kontinua iha tinan sira oin mai, atu kompleta ligasaun ba parte ba to’o Holsa-Taz hodi fasilita tan movimentu populasaun nian.
Estrada rurál Dom Bosco – Taz ne’e konsidera importante tanba sai asesu ba komunidade iha área ne’e, liuliu ba transporte ema no sasán, nune’e bele apoia atividade sosiál no ekonomia komunidade lokál.
Estrada ne’e hahú implementa konstrusaun betaun iha fulan-Marsu tinan 2026 ho totál orsamentu $33.092,06.
Notísia relevante: Orsamentu PNDS 2026 iha Bobonaru aloka ba obra 50 no projetu adisionál 18
Jornalista: Sergio da Cruz
Editora: Maria Auxiliadora
