Komisaun G rona preokupasaun kona-ba pagamentu mudansa eskalaun no grau manorin sira
DILI, 07 Outubru 2026 (TATOLI) – Komisaun G ne’ebé trata Asuntu Edukasaun, Juventude, Desportu, Kultura no Sidadania, simu audiénsia husi Konsellu Profesór Timor-Leste (KPTL) hodi rona no aprezenta preokupasaun kona-ba Ministériu Edukasaun (ME), ne’ebé to’o agora seidauk halo pagamentu ba mudansa eskalaun.
“Ami reprezenta konsellu profesór iha territóriu laran, mai husu ami-nia direitu kona-ba mudansa eskalaun no grau. Problema ne’e akontese husi 2015 to’o 2020”, Portavós Konsellu Profesór, Marcelino da Costa Belo, hatete hafoin ramata audiénsia iha Parlamentu Nasionál, ohin.
Bazeia ba dekretu-lei númeru 31/2023, loron 31 Maiu, iha Oitavu Governu aprova ona diploma ne’e no Ministériu Edukasaun implementa ona artigu 11 kona-ba progresaun ida espesiál nian, kargu xefia, rekrutamentu ba iha bolsa kandidatu.
Hodi husu atu implementa diploma no labele realiza de’it balun, liuliu kona-ba mudansa eskalaun, tanba avaliasaun dezempeñu muito bom dalarua tuir malu maka eskalaun ne’e sa’e, nune’e grau mós sa’e.
“Só ke ami-nia problema mak ida-ne’e, seidauk implementa, tanba ne’e ohin ami mai husu ba Komisaun G karik halo audiénsia ho Ministériu Edukasaun labele haluha atu ko’alia kona-ba ami-nia asuntu ida-ne’e”, nia dehan, tanba reokupasaun ne’e hato’o beibeik ba ministériu, maibé seidauk iha resposta.
“Ami-nia ezijénsia mak liuhusi Komisaun G, iha OJE 2027 labele haluha prevee pagamentu ba mudansa eskalaun no grau no rejime espesiál”, nia sujere.
Iha fatin hanesan, Prezidente Komisaun G, Armando dos Santos Lopes, dehan manorin-na’in sira-nia eskalaun sa’e ona maibé to’o agora seidauk iha pagamentu, nune’e komisaun iha audiénsia proposta OJE 2027 ho ME sei hato’o kestaun ne’e hodi buka solusaun.
Jornalista: Nelson de Sousa
Editora: Maria Auxiliadora
