Ekipa Reitoria UNTL sosializa oportunidade asesu bá universidade estatál
DILI, 8 Outubru 2026 (TATOLI)—Reitór Universidade Nasionál Timor Lorosa’e (UNTL), Joviano António da Costa, hateten oras ne’e ekipa Reitoria UNTL halo sosializasaun ba estudante sira husi eskola sekundária iha munisípiu sira kona-ba oportunidade atu asesu ba universidade Estadu nian.
Sosialisasaun ne’e ho objetivu atu fó informasaun ba estudante sira kona-ba prosesu asesu ba UNTL, inklui oportunidade atu kandidata no prosesu selesaun ne’ebé universidade hala’o.
Nia hateten estudante hotu-hotu ne’ebé ramata ensinu sekundáriu iha Timor-Leste iha direitu atu kandidata ba UNTL, tanba UNTL nu’udár universidade Estadu nian.
“Estudante sekundáriu hotu-hotu iha Timor-Leste, bainhira sira ramata, sira iha direitu hotu atu asesu mai iha UNTL, tanba únika universidade Estadu,” nia dehan ba jornalista sira iha Palm Spring, Fatuhada, Dili, Kinta ne’e.
Maibé, nia esplika, tanba númeru kandidatu barak, UNTL presiza halo selesaun bazeia ba rezultadu estudante sira no kapasidade vaga ne’ebé disponivel iha universidade.
Joviano hatutan númeru estudante ne’ebé UNTL simu kada tinan la’ós fiksu, tanba depende ba rezultadu ezame nasionál no númeru vaga ne’ebé universidade prepara.
“Normalmente ami fó to’o 3.000-resin, maibé tinan balun bele sai to’o 5.000. Ne’e la iha serteja, la fiksu,” reitór subliña.
Jornalista: Osória Marques
Editór: Xisto Freitas da Piedade
