Top

Sakrifísiu no perseveransa transforma ONG sai Banku Kaebauk ho kapitál millaun $54

Prezidente Repúblika, José Ramos-Horta akompaña husi CEO Banku Kaebauk hamutuk ho fundadór sira iha lansamentu ofisiál Banku KAEBAUK, S.A., iha Bebonuk, Dili 23 Outubru 2026. Imajen TATOLI/António Daciparu.

DILI, 23 Outubru 2026 (TATOLI) –Kaebauk realiza seremónia ofisial hodi eziste nu’udar banku komersiál foun iha Timor-Leste ne’ebé ho kapitál millaun $54, hafoin liuhusi prosesu krusiál no desizivu ida.

CEO Banku Banku S.A, Ángelo Soares, rekorda katak preparasaun Kaebauk atu sai banku liuhusi prosesu lubuk ida, Kaeabauk hahú sumbete pedidu atu sai banku iha Fevereiru 2025 no hetan lisensa provizóriu iha Fevereiru 2026 kontinua kompleta ninia rekezitu sira ikusmai hetan lisensa sai hanesan banku privadu dahuluk iha Timor-Leste husi Banku Sentrál Timor-Leste (BCTL, sigla portugés) iha 10 Setembru 2026.

“Ami hahú husi NGO Tuba Rai-Metin ne’ebé programa mikrokreditu iha tinan-2001, ne’ebé sai hanesan fó kreditu ba ema ema, hahú ho kapitál $150.000, kontinua esforsu to’o mai ohin lansa ofisialmente sai banku komersiál iha Timor-Leste ne’ebé daudaun ho kapitál millaun $54,” Ángelo Soares, hateten ba TATOLI.

Nia esplika to’o agora sira iha sukursal hamutuk 21 iha munisípiu sira no iha kliente to’o Outubru 2026 hamutuk 24.000 no alvu Dezembru tenke atinji kliente 27.000 no kapitál tenke to’o millaun $58,6 millaun.

Istória sakrifísiu iha tempu krize

Nia dehan, ho prosesu hotu to’o mai ohin loron viajen ida-ne’e la’ós de’it kona-ba harii edifísiu ka dezenvolve teknolojia modernu, maibé mós kona-ba istória, esperiénsia, sakrifísiu no kompromisu ne’ebé harii instituisaun ida-ne’e to’o sai hanesan hothotu haree ohin loron.

Nia haktuir, sira hahú ho programa mikrokreditu, ne’ebé hahú iha 2001 ne’e halo atendimentu ba kliente ida-idak ho atensaun no kuidadu, hodi kontinua habelar servisu husi komunidade ida ba komunidade seluk.

“Iha prosesu ne’e, ami hasoru difikuldade oioin, liuliu iha situasaun ne’ebé difisil, inklui iha tinan-2006 no 2007. Iha tempu ne’ebá, tanba apoiu ne’ebé limitadu, ami tenke halo sakrifísiu boot, inklui hamenus ami-nia saláriu no benefísiu sira. Ida-ne’e sai parte husi sakrifísiu no dedikasaun ne’ebé ami, hanesan ekipa no fundadór sira, hatudu atu bele kontinua servisu. Ami tenke viajen husi munisípiu ida ba munisípiu seluk atu atende komunidade no kliente sira,” nia haktuir

Nia hatutan, sakrifísiu ne’e mak sai parte importante husi istória no fundasaun Banku Kaebauk nian. Maski sira hasoru difikuldade oioin, ne’ebé sai parte husi jornada ba dezenvolvimentu instituisaun ida-ne’e, sira nunka lakon motivasaun no espíritu servisu.

“Ami nafatin iha fiar no esperansa katak, loron ida, ami-nia programa mikrokreditu sei dezenvolve no transforma an sai banku ida. Vizaun ida-ne’e mak kontinua inspira ami atu la sente kole no la deziste, maski ami hasoru obstákulu no situasaun ne’ebé difisil,” nia dehan.

Lisensa foun no responsabilidade boot

CEO Kaebauk ne’e haktuir ho grasa Maromak nian, no liuhusi esforsu, sakrifísiu, dedikasaun no perseveransa, vizaun ne’ebé sira iha iha tempu uluk ne’e, ohin loron sai realidade, ohin haree ona banku ida-ne’ebé hamriik metin, hanaran Banku Kaebauk.

“Realidade ida-ne’e hatudu katak, ho vizaun ne’ebé klaru, kompromisu no vontade atu servisu, buat ne’ebé hahú husi ki’ik bele dezenvolve no sai realidade boot ida. Ita hotu hatene katak ami hetan ona lisensa atu hala’o operasaun bankária. Maibé, ba ami, lisensa ida-ne’e la’ós de’it susesu ida-ne’ebé ami tenke selebra, maibé mós responsabilidade boot ida-ne’ebé ami tenke simu no hala’o ho seriedade,” nia dehan.

Nia subliña Banku Kaebauk komprende katak hetan lisensa bankária signifika hahú etapa foun ida, ne’ebé sei lori dezafiu, obstákulu no responsabilidade barak liután.

“Tanba ne’e, ami tenke kontinua aprende, adapta-an no hadi’a ami-nia servisu, atu sai forte, metin no preparadu liután hodi responde ba nesesidade kliente sira. Ami tenke servisu ho laran tomak, responsabilidade, transparénsia, onestidade no integridade, atu hametin no mantein konfiansa kliente sira ba ami-nia instituisaun, servisu no produtu sira ne’ebé ami oferese. Tanba ami fiar katak konfiansa kliente nian mak baze importante ida ba susesu no sustentabilidade Banku Kaebauk nian,” hatete.

Prioridade estratéjiku tolu Kaebauk nian

Iha oportunidade ida-ne’e, kaebauk hakarak deklara katak, maski Banku Kaebauk transforma ona husi programa mikrokreditu sai banku komersiál, komprimetidu kontinua mantein sira-nia identidade no kompromisu atu fó prioridade ba servisu mikrofinansa.

“Maski ami agora sai banku komersiál no oferese produtu finanseiru oioin, hanesan banku komersiál sira seluk, ami kontinua fó atensaun espesiál ba mikrofinansa. Ami-nia objetivu mak atu serve agrikultór sira, empreendedór ki’ik sira no komunidade sira iha área rurál, ne’ebé seidauk iha asesu sufisiente ba servisu no asisténsia bankária,” nia tenik.

Tanba ne’e, Kaebauk define prioridade prioridade prinsipál tolu primeiru sira hanesan espansaun kreditu iha merkadu Timor-Leste. Hakarak habelar asesu ba kreditu iha territóriu tomak, hodi apoia no diversifika setór ekonomia, inklui agrikultura, komérsiu ki’ik no atividade negósiu sira ne’ebé bele kria oportunidade ekonomia ba komunidade.

Segundu: Inkluzaun finanseira. Sira-nia servisu finanseiru la’ós atu limita de’it ba ema sira ne’ebé hela iha área urbana, maibé tenke to’o mós ba komunidade sira iha área rurál. Hakarak promove kultura poupansa, fasilita asesu ba kreditu no dezenvolve edukasaun finanseira, liuliu ba jerasaun foun, atu sira bele komprende no jere osan ho di’ak, no prepara sira-nia futuru finanseiru.

Terseiru: Dijitalizasaun no transformasaun dijital. Kompromete-an atu promove transformasaun dijitál iha sistema finanseiru, inklui dezenvolvimentu servisu online, mobile banking no integrasaun plataforma dijitál atu fasilita transasaun finanseira.

Inisiativa sira-ne’e sei ajuda atu hadi’a asesu, efisiénsia no kualidade servisu ba kliente sira, no iha tempu hanesan aliña ho orientasaun no planu estratéjiku BCTL nian.

“Ami fiar katak liuhusi prioridade sira-ne’e, Banku Kaebauk bele kontinua dezenvolve an, hametin inkluzaun finanseira no kontribui ba dezenvolvimentu ekonómiku Timor-Leste, liuliu ba komunidade no negósiu ki’ik sira ne’ebé presiza apoiu atu dezenvolve.

Apresiasaun husi BCTL no Prezidente Repúblika

Enkuantu, Governadór BCTL, Helder Lopes, hato’o parabéns ba Banku Kaebauk, ne’ebé konsege transforma an husi instituisaun mikrofinansa sai banku komersiál iha Timor-Leste.

Nia dehan, ohin selebra la’ós de’it Banku Kaebauk nia susesu atu sai banku komersiál, maibé mós nia dedikasaun, esforsu no kompromisu ne’ebé lori instituisaun ne’e to’o iha etapa importante ida-ne’e.

“Parabéns ba Banku Kaebauk. Ami hein katak Banku Kaebauk sei kontinua dezenvolve an, hametin konfiansa públiku no kontribui ba dezenvolvimentu setór finanseiru no ekonomia Timor-Leste nian,” dehan.

Governadór BCTL ne’e mós hato’o apresiasaun ba instituisaun mikrofinansa no instituisaun finanseira sira iha Timor-Leste, ne’ebé dedika sira-nia an, esforsu no rekursu finanseiru atu apoia negósiu mikro no empreendedór ki’ik sira.

Instituisaun sira-ne’e iha papél importante tebes atu fasilita asesu ba finansiamentu, ajuda empreendedór sira dezenvolve sira-nia negósiu, no kria oportunidade ekonómika ba komunidade sira, liuliu iha área rurál.

Apoiu ne’ebé sira fó la’ós de’it kontribui ba kresimentu negósiu ki’ik sira, maibé mós ajuda hametin inkluzaun finanseira no dezenvolvimentu ekonómiku iha Timor-Leste.

“Iha tempu agora, ita hotu hatene katak ekonomia presiza apoiu no finansiamentu atu sustenta atividade negósiu, liuliu empreza mikro, ki’ik, média no boot. Iha kontestu ida-ne’e, instituisaun finanseira sira ne’ebé dedika sira-nia an atu suporta segmentu merkadu ida-ne’e iha papél importante tebes,” Helder Lopes hatete.

Iha seremónia ofisiál lansamentu Banku Kaebauk ne’e, lansa direitamente hosi Prezidente Republika, José Ramos-Horta, ne’ebé kongratula banku Kaebauk no husu kontinua apoiu ekonomia lokál.

Jornalista: Arminda Fonseca 

Editór: Rafael Ximenes de A. Belo

Publisidade

Leave a Reply

Latest Post

error: Content is protected !!